Yuri Matias: “Cavab oyununda qələbə üçün canımızı verməliyik”

“Bu, derbi matçı idi. “Neftçi” - “Qarabağ” oyunu Azərbaycan futbolçu üçün vacib qarşılaşmadır. Bilirdik ki, çətin görüş olacaq. “Qarabağ” güclü rəqibdir”.

Futbolxeber.az saytına açıqlamasında bu sözləri “Neftçi”nin müdafiəçisi Yuri Matias Azərbaycan Premyer Liqasının XXXI turunda “Qarabağ”a qarşı keçirilən oyundan sonra deyib.

Braziliyalı futbolçu 0:3 hesablı məğlubiyyəti belə şərh edib: “Oyuna yaxşı başladıq. İlk qoldan sonra təxminən 5 dəqiqə ərzində sanki çaşqınlıq yarandı. Qapımızda ardıcıl qollar gördük. 0:3-dən sonra geridönüş etmək çətin idi. Nə qədər çalışsaq da, məğlubiyyətdən qaçmaq mümkün olmadı”.

O, aprelin 23-də “Sabah”a qarşı keçiriləcək kubok oyunundan da söz açıb: “İlk matçda 1:2 hesabı ilə uduzmuşuq. Lakin hələ heç nə bitməyib. Qarşıda cavab oyunu var. Vəziyyəti dəyişmək lazımdır. Mütləq geridönüş etməliyik. Bunun üçün daha yaxşı, daha diqqətli olmalıyıq. “Sabah”la görüş bizim üçün çox vacibdir. Qələbə üçün canımızı verməliyik”.

Fərəc Aslanov