Azər Bağırov: "Azarkeşlərimizin rəğbətini qazanmışıq"

“Hər kəsi Zəfər Günü münasibətilə təbrik edirəm. Allah şəhidlərimizə rəhmət eləsin. Gərgin oyun oldu. Qələbə qazanmaq istəyirdik. Heç vaxt heç-heçə barədə düşünmək istəmirik. Komandada qələbə ruhunu yaşatmaq istəyirəm. Amalımız döyüşkən komanda yaratmaq, heç kimdən çəkinməməkdir”.

Futbolxeber.az saytının məlumatına görə, bu sözləri “Kəpəz”in baş məşqçisi Azər Bağırov Azərbaycan Premyer Liqasının XIII turunda “Sabah”la heç-heçə etdikləri oyun barədə danışarkən deyib.

O, hakimliklə bağlı bunları söyləyib: “Rəşad Əhmədov ötən mövsüm 26-cı turda cəzalandı, sonra 10 tur təyinat almadı. Yəqin ki, səbəbləri var idi. Bu gün də VAR-da Rəşad əyləşmişdi. Yaxşı bir şey gözləmirdim”.

Mütəxəssis çempionatdakı fasilənin komandasına necə təsir edəcəyini bilmir: “Üstün cəhəti də ola bilər, mənfi cəhəti də. İnanıram ki, fasilə xeyrimizə işləyəcək. Oyundan-oyuna komandada döyüşkənlik artır. Bu, müsbət haldır. Fasilədən sonra çalışacağıq ki, daha yaxşı olaq”.

A.Bağırov gəncəli veteranların narazılığına belə münasibət bildirib: “Təbii haldır. Hamı cavan kadrlara şübhəli yanaşır. Şükürlər olsun ki, bugünkü gündə dəstəyimiz var. Azarkeşlərimiz oyunlara gəlirlər. Gəncədə futbolu sevirlər. Hərənin sevgisi bir cür ola bilər. Amma nəticə də çox önəmlidir. "Səbail"lə oyunda bir az zəif çıxış etdik, amma nəticə qazandıq. Məncə, azarkeşlərimizin rəğbətini qazanmışıq və bizi sevirlər, dəstəkləyirlər”.