Eddi “Neftçi”dən niyə getdi?

Bu günlərdə “Neftçi”nin Eddi İsrafilovla yollarını ayırması barədə xəbər çoxlarını təəccübləndirdi. Keyfiyyətli yerli oyunçu qıtlığı yaşayan “ağ-qaralar”ın kapitanlarından biri ilə vidalaşması heç də birmənalı qarşılanmadı. Az sonra futbolçu sosial şəbəkə hesabında paylaşım etməklə “Neftçi” rəhbərliyindən şikayətləndi də.

Lakin bu məsələ ilə bağlı detallar onu deməyə əsas verir ki, İsrafilovun şikayəti tam əsassızdır. Futbolçu klub rəhbərliyini yox, özünü qınamalıdır.

Belə ki, “Neftçi” ilə 32 yaşlı yarımmüdafiəçi arasında yeni müqavilə ilə bağlı danışıqlar hələ qışda başlayıb. “Ağ-qaralar” həmin vaxt İsrafilova 2 illik müqavilə təklif edib. Lakin futbolçu transfer dəyərini artırmaq, daha çox qazanmaq üçün danışıqları uzadıb. O, klubdan təklif olunandan daha çox məbləğ tələb edib. “Neftçi” isə təklif etdiyi məbləğdən artığını ödəmək istəməyib. Beləcə məsələ uzanıb. Mövsümün sonunda tərəflər yenidən danışıqlar masasına oturublar. Bu zaman “Neftçi” Eddiyə 1+1 illik sözləşmə təklif edib. Klubun belə təklif etməsi heç də səbəbsiz deyil. Məlum məsələdir ki, qarşıdakı mövsümdə də Azərbaycan Premyer Liqasında legioner limiti 7+4 olacaq. Növbəti mövsüm isə limit 8+3-ə dəyişəcək. Bu isə avtomatik olaraq yerli futbolçuların qiymətinin aşağı düşməsi deməkdir. Loru dildə desək, 7+4 limitində illik 100 minə oynayan yerli futbolçunun qiyməti limit 8+3 olduqda 70-80 minə düşəcək. Məhz bu səbəbdən də “Neftçi” rəhbərliyinin İsrafilova 1+1 illik müqavilə təklif etməsi anlaşılandır. Eddi də növbəti mövsüm limitin dəyişəcəyindən xəbərdar olduğu üçün necə deyərlər, işini sağlama almaq istəyib. Lakin klub rəhbərliyi futbolçunun nazı ilə çox oynamayıb və haqlı olaraq qərarında təkid edib və yekunda da futbolçu ilə yolları ayırmaq qərarına gəlib. Yaxşı olardı ki, İsrafilov bu gün klub rəhbərliyini qınamaqdansa, günahı özündə görsün. Hər halda düşünməliydi ki, “qiymət oxumağın” axırı belə ola bilər...

İBRAHİM