“Ayın qolu”nun müəllifi: “Seçim məndə olsaydı da, öz qolumu ən yaxşı seçərdim” (MÜSAHİBƏ)

“Zirə”nin müdafiəçisi Məqsəd İsayev Azərbaycan Premyer Liqasının IX turu çərçivəsində “Turan Tovuz”a qarşı keçirilən oyundan sonra Futbolxeber.az saytının əməkdaşının suallarını cavablandırıb.

- İlk dövrənin son turunda “Turan Tovuz” üzərində qələbə (2:1) qazandınız. Qazanılan 3 xalı necə şərh edərdin?

- Oyun bizim üçün yaxşı alındı. Matçdan əvvəl istədiklərimizin demək olar ki, hamısını meydanda həyata keçirdik. Qalib gəldiyimiz üçün sevincliyik. Gözəl oyunla layiqli 3 xal qazandıq. Amma bunun ardını gətirmək üçün daha çox çalışmalıyıq. Artıq bu qalibiyyəti unudub növbəti oyunlara köklənməliyik.

- Lider tamamladığımız ilk dövrəni “Zirə” üçün əla qiymətləndirmək olar?

- İlk dövrədə 19 xal yığmaq çox yaxşı nəticədi. Çempionatdan əvvəl desəydilər ki, “Zirə” ilk dövrədə məhz bu qədər xal toplayacaq, yəqin ki, heç kəs inanmazdı. Amma biz xarakterk göstərərək bu nəticəni qazandıq. Hazırda liderik və hesab edirəm ki, buna layiqik.

- Liderliyi qarşıdakı dövrələrdə davam etdirmək çətin olmayacaq ki?

- Təbii ki, çətin olacaq. Amma indidən nəsə demək istəməzdim. Gələcəkdə nə olacağını görəcəyik.

- Matçdan öncə ötən ayın ən yaxşı qolunun müəllifi kimi mükafatlandırıldın. Əvvəldən qalib olacağını gözləyirdin?

- Həmin qolu “Sumqayıt”la oyunda vurmuşdum. Təbii ki, həmin vaxt qalib olacağımı bilməzdim. Sonradan qollara baxanda gördüm ki, ən yaxşı qolu elə özüm vurmuşam. Düzgün qərar verdilər.

- Seçim ixtiyarı səndə olsaydı, hansı qolu ən yaxşı seçərdin?

- Seçim məndə olsaydı da, özümü seçərdim.

- Həmin qolda komanda yoldaşlarının da rolu olub. Qazandığın mükafatdan onlara da pay düşəcək?

- Hələ mükafatı alım, sonrasını fikirləşərik (gülür).

Fərəc ASLANOV