“Hatayspor”un fəxri prezidenti: “Renat Dadaşov gələcək üçün ümid verən futbolçudu”

Türkiyənin "Hatayspor" klubunun fəxri prezidenti Lütfü Savaş yeni transferləri haqda danışıb.

Futbolxeber.az saytının məlumatına görə, klub rəhbəri yerli mətbuata açıqlamasında "Qrasshopper"dən icarəyə götürdükləri azərbaycalı futbolçu Renat Dadaşov haqda da fikirlərini bildirib.

Belə ki, o, millimizin 24 yaşlı hücumçusunun gələcək vəd edən futbolçu olduğunu bildirib: "Yeni transferlərdən Maksimoviç ilk məşqdə zədələndi. Hazırda vəziyyəti yaxşıdı və ilk matçda oynaya biləcək vəziyyətdədi. Bir də Faouzi Ghoulam var. İkisi də İtaliyada ən üst səviyyədə futbol oynayıblar. Honduras milli komandasının üzvü Riqoberto Rivası aldıq. Bu oyunçu önümüzdəki matçlarda komandada öz yerini alacaq. Azərbaycan milli komandasında çıxış edən Renat Dadaşovu transfer etdik. Yeni oyunçularımız ölkələrinin ya əsas, ya da U-21 yığmalarında çıxış edirlər. Yəni gələcək üçün bizə ümid verən futbolçulardı. Bu 4 oyunçudan ən azı 3-ü Super Liqanın "Fatih Karagümrük"lə matçında meydanda olacaq".