"Qarabağ"ın baş meneceri Avropa Klublar Birliyinin İcraiyyə Şurasına üzv seçilib

"Qarabağ" Futbol Klubunun İdarə Heyətinin üzvü Asif Əsgərov Avropa Klublar Birliyinin (ECA) qərarverici orqanı olan İcraiyyə Şurasına üzv seçilib.

 

Futbolxeber.az saytının məlumatına görə, o, qurumun Berlində təşkil olunan Assambleyası çərçivəsində bu gün keçirilən seçkidə klubların səs çoxluğunu qazanıb. O, 2023-27-ci illər üçün bu qurumda təmsil olunmaq hüququ qazanıb.

 

Qeyd edək ki, Avropa Klublar Birliyi özündə qitənin 500-dək klubunu birləşdirir. Azərbaycandan həmin təşkilatda "Qarabağ", "Qəbələ", "Neftçi" və "Sumqayıt" təmsil olunur. 

 

A.Əsgərovun namizədliyini Avropanın bir neçə aparıcı klubu irəli sürüb. 

 

Qeyd edək ki, 2008-ci ildə təsis olunan ECA UEFA-nın tanıdığı yeganə klub təşkilatıdır. Qurum Avropada klubların maraqlarını müdafiə edir. Qitənin bütün TOP klubları bu quruma üzvdürlər. Avropada klub yarışları (Çempionlar Liqası, Avropa Liqası, Konfrans Liqası) məhz ECA-nın tövsiyəsindən sonra UEFA tərəfindən nəzərə alınmaqla keçirilir. Ümumiyyətlə, ECA bu gün Avropa klubları üçün böyük əhəmiyyət daşıyan, söz sahibi olan mötəbər qurumdur.

 

Əlavə edək ki, ECA-ın İcraiyyə Şurasında 24 nəfər təmsil olunur. Bugünkü seçkiyə qədər quruma və Şuraya PSJ-nin prezidenti, məşhur ərəb iş adamı Naser Əl-Xəlaifi rəhbərlik edir. Həmçinin Şura üzvlüyündə "Ayaks", "Atletiko", "Arsenal", "Tottenhem", "Borussiya" (Dortmund),  "Bayer", "Roma", "Milan", "Fənərbaxça" kimi klubların rəhbər şəxsləri də təmsil olunub.