İsveç yığmasının sabiq üzvü: “Musa Qurbanlı yenə qollar vuracaq”

“Musa Qurbanlı “Yurqorden”də yenə qollar vuracaq”.

Futbolxeber.az saytının məlumatına görə, bunu İsveç yığmasının sabiq futbolçusu Tobias Hisen Azərbaycan yığmasının hücumçusu Musa Qurbanlının klubu “Yurqorden”in heyətində ölkə çempionatında “Deqerfors”la görüşdə dubl etməsi ilə bağlı danışarkən deyib.

2004-2006-cı illərdə “Yurqorden”in formasını geyinmiş sabiq forvard matçda Qurbanlının penaltini qaçıraraq het-trik şansını əldən verməsinə də münasibət bildirib: “Musa hələ mövsümün əvvəlində özünə 3-4 oyunluq vaxt vermişdi. Onun penaltini qaçırdığı üçün əsəbiləşməsində qəribə heç nə yoxdur. Amma əsas odur ki, qol vurmağa başlayıb. Dubl etdiyi üçün penaltini qaçırmasından narahatlıq keçirəcəyini düşünmürəm”.

Qeyd edək ki, “Yurqorden”in 4:1 hesabı ilə qalib gəldiyi qarşılaşmada Musa Qurbanlı iki qol vurmaqla yanaşı, bir qolun da məhsuldar ötürməsini verib.