“Turan Tovuz” 2 legionerin yolunu gözləyir: “O, iyulun 23-də düşərgəmizdə olacaq”

“Bir müddətdir Panama millisinin düşərgəsində olan Roderik Miller bizimlə birgə deyil. O, iyulun 23-də düşərgəmizdə olacaq. Yeni transferlərdən Otto Con viza məsələsinə görə hələ təlim-məşq toplanışına qatılmayıb. Tezliklə o da komandaya qoşulmalıdı”.

Futbolxeber.az saytına müsahibəsində bu sözləri “Turan Tovuz”un baş məşqçisi Ayxan Abbasov deyib.

Mütəxəssis dünən “Adana Demirspor”a qarşı keçirilən yoxlama matçında Fərid Nəbiyevin iştirak etməməsinin səbəbini də açıqlayıb: “Fərid Nəbiyevin bir az ağrıları var. Ona görə də risk eləmədik. Dünənki görüşdə meydana çıxmadı”.

Abbasov futbolçularının həvəslə çalışdığını bildirib: “Komandada hər şey qaydasındadı. Hazırlığımız plan üzrə davam edir. Futbolçular həvəslə çalışırlar ki, bu da bizi sevindirir”.

Tovuz klubunun çalışdırıcısı transfer çalışmaları barədə də danışıb: “Orta sahəyə oyunçu axtarışımız davam edir. Daha bir futbolçuya ehtiyacımız var. Hər mövqedə rəqabət olmasını istəyirik. Eləcə də hansısa gənc futbolçu olarsa, onu heyətimizə qata bilərik. Hazırda real bir şey yoxdu. Təlim-məşq toplanışının sonuna yaxın transfer çalışmalarını bitirməyə çalışacağıq”.

İbrahim CƏFƏROV