Okan Buruk: "Qarabağ" sanki avrokubok oyununa çıxmışdı"

"Evimizə gəlmiş kimi olduq. Bu stadionda bu şəhərdə möhtəşəm qarşılandıq. Əsas məqsəd Türkiyədə baş verən zəlzələdə zərərçəkənlərə yardım etmək idi".

Futbolxeber.az saytının məlumatına görə, bu sözləri "Qalatasaray"ın baş məşqçisi Okan Buruk Bakıda "Qarabağ"la keçirdikləri xeyriyyə oyunu (2:1) haqda danışarkən deyib.

Mütəxəssis qeyd edib ki, qələbə qazandıqları üçün xoşbəxtdirlər: "Çox gözəl futbol gecəsi oldu. Hər kəsə təşəkkür edirəm. Xüsusilə, "Qarabağ" daha diqqətli və hazır idi. Heyətdə rotasiyalar etmişdik. Bəzi oyunçular şans qazanmırdı. Qələbə qazandığımız üçün xoşbəxtik. Sizinlə birlikdə olmaqdan daha çox şadıq".

O, Ağdam təmsilçisi ilə dostluqlarının davam edəcəyini deyib: "Şəhərə gec gəldik. Çətinliklər bizi belə oyundan məhrum etmədi. Əsas burada birlikdə olduğumuzu göstərmək idi. Bu, başlanğıc idi. "Qarabağ"la olan dostluğumuz davam edəcək. "Qarabağ" Türkiyəyə gələcək, biz Bakıya. Burada möhtəşəm atmosfer var idi. Burada olduğum müddətdə tez-tez belə oyunların keçirilməsini istəyəcəyəm".

Okan Buruk bildirib ki, "Qarabağ"ın yaxşı baş məşqçisi və futbolçuları var: "Bu gün bir neçə futbolçu ön plana çıxdı. "Qarabağ"ı bəyəndim. Yaxşı komandadır və yaxşı baş məşqçiləri var. Oyuna yaxşı hazırlaşmışdılar, sanki avrokubok matçına çıxmışdılar. Biz belə diqqətcil ola bilmədik".