“Neftçi”: açıq məşq və mətbuat konfransının vaxtı açıqlandı

UEFA Konfrans Liqasının II təsnifat mərhələsi çərçivəsində iyulun 21-i Bakı vaxtı ilə saat 21:30-da Kiprin Limassol şəhərindəki “AEK Arena” stadionunda keçiriləcək “Aris” - “Neftçi” oyunu öncəsi təmsilçimizin baş məşqçisi Laurentsiu Regekampf və serbiyalı futbolçu Voislav Stankoviçin iştirakı ilə mətbuat konfransı təşkil olunacaq. 

Futbolxeber.az-ın klubun rəsmi saytına istinadən verdiyi məlumata görə, tədbir iyulun 20-si Bakı vaxtı ilə saat 21:00-da “AEK Arena”nın mətbuat zalında baş tutacaq. Konfransdan sonra - saat 21:30-da isə “Neftçi”nin media nümayəndələri üçün açıq məşqi (ilk 15 dəqiqəsi) reallaşacaq.

Eyni məkanda həmin gün Bakı vaxtı ilə saat 19:15-də “Aris”in baş məşqçisi Aleksey Şpilevski və qapıçısı Vana Alvesin iştirakı ilə mətbuat konfransı, 19:45-də isə rəqib komandanın açıq məşqi (ilk 15 dəqiqəsi) olacaq.

Qeyd edək ki, bu tədbirlərin “Neftçi TV” vasitəsilə canlı yayımlanması nəzərdə tutulub.