Fransadakı səfirimiz "Bakı" rəsmiləri ilə görüşdü

Sentyabrın 25-də - beynəlxalq "Top Resa" sərgisinin ikinci günündə də Azərbaycanın guşəsi, xüsusən də ölkəmizi idman sahəsində təmsil edən "Bakı"nın stendi böyük maraqla qarşılanır. Futbolxeber.az-ın məlumatına görə, səhər saat 11-də Azərbaycanın Fransadakı fövqəladə və səlahiyyətli səfiri Elçin Əmirbəyov sərgi keçirilən salona təşrif buyurdu. "Bakı" rəsmilərindən Nail Əliyev və Yaşar Seyidov cənab səfirə sərginin axarı, eləcə də "Bakı" - "Lans" əməkdaşlığının perspektivləri haqqında məlumat verdi. Təbliğat yönündə müvafiq tövsiyyələrini çatdıran Elçin Əmirbəyova "Bakı"nın atributları hədiyyə olundu. Azərbaycan televiziyasının Avropa bürosunun rəhbəri Elnar Məmmədov da bu səfər haqqında reportaj hazırladı.

Ardından nəqliyyat, turizm və kommunikasiya üzrə baş direktor Alan Banyo və "Top Resa" sərgisinin direktoru Tomas Despleyn sərgidə Azərbaycan üçün ayrılan yerə baş çəkdi. Nüfuzlu qonaqlara Azərbaycanın mədəniyyəti və turizm potensialı haqqında məlumat verildi. Təbii ki, "Bakı" - "Lans" əməkdaşlığı, əlaqələrin gələcək perspektivləri də unudulmadı."Bakı" rəsmiləri qonaqlara həmçinin klubun atributlarını təqdim etdi.

Xatırladaq ki, nüfuzlu sərgi hələ sentyabrın 27-nə qədər davam edəcək. Sabah isə "Lans"la əməkdaşlıq müqaviləsinin təntənəli şəkildə imzalanması gözlənilir.