Futbol azarkeş üçündür... qeyrisi təfərrüatdır

Bütün dünyada olduğu kimi, ölkəmizdə də “Fənərbaxça”nın yüzminlərlə azarkeşi var. Azarkeş üçün sevdiyi klubun ölkəsinə gəlişindən böyük nə hədiyyə ola bilər? Məsələn, öz adımdan deyə bilərəm ki, uşaqlıqdan əhdim var, “Milan” nə vaxtsa Bakıya gəlsə, yaşadığım evdən hava limanına qədər piyada gedəcəm. Yəqin ki, mənim kimi əhdi, arzusu olan xeyli sayda “Real”, “Mançester Yunayted”, “Bavariya”, “Yuventus” azarkeşi var...

Təbii ki, paytaxtımıza bu günə qədər çox tanınmış klub gəlib. Ola bilər “Fənərbaxça” gücünə görə həmin klublar arasında ilk üçlükdə deyil. Amma əminəm ki, “Fənər” azarkeş sevgisinə görə ən azı ilk üçlükdədir. Bütün bunları nəzərə alaraq onminləri, yüzminləri sevindirdiyi üçün “Turan Tovuz”a, Ehtiram Quliyevə təşəkkür düşür.

Fikir verirəm, dünəndən sosial şəbəkələrdə “Fənərbaxça”lılar xaric, əksəriyyət od püskürür. Himn elə gəldi, Gündüzi belə getdi, Əziz Yıldırım VİP-i tərk etdi və s. Sıravi azarkeşə bütün bunların nə dəxli var? Onun himn, yaxud Əziz Yıldırımın haranısa 5 dəq tez tərk etməsi nəyinə lazımdır? Azarkeşə nə lazımdır? “Fənərbaxça”sı gəldi, gördü, azarkeşliyini etdi, getdi. Gerisi təfərrüat...

Yaxın bir dostumun oğlu var, 7 yaşındadır. Yaşı az olsa da, futbol sevgisi böyükdür. Dünəndən mənə 3 dəfə mesaj yazıb, təəssüratlarını bölüşür. Əminəm ki, onun kimi yüzlərlə uşaq dünənki matçın ajiotajını hələ uzun müddət unutmayacaq.

İnanın ki, təşkilatçılıqla bağlı qüsurlar, çatışmazlıqlar azarkeşi zərrə qədər də maraqlandırmır. Mən razıyam, qoy Azərbaycan çempionatının da hər oyununa dünənki qədər azarkeş gəlsin, eybi yoxdur, hər matçda təşkilatçılıqda problem ortaya çıxsın, lap mətbuat konfransı belə olmasın, yetər ki, azarkeş gəlsin. Axı futbol azarkeş üçün oynanılır...

İBRAHİM