Rəşad Sadıqov: “Belə uzun fasiləyə öyrəşməmişik”

"Zirə” yoxlama oyununda “Qarabağ”a 1:3 hesabı ilə uduzub.

Futbolxeber.az saytının məlumatına görə, matçdan sonra "Zirə"nin baş məşqçisi Rəşad Sadıqov jurnalistlərin suallarını cavablandırıb. O, çempionatda fasilənin uzun alındığını söyləyib:

“Biz belə uzun fasiləyə öyrəşməmişik. Milli komandalara çağırılan futbolçularımızı və zədələri nəzərə alaraq bir yoxlama oyunu keçirməyə qərar verdik. Hər iki komanda istəkli oynadı. Əsas məqsəd “Şamaxı” ilə oyuna yaxşı hazırlaşmaq idi. Ümid edirəm ki, yaxşı çıxış edib, bizə lazım olan nəticəni qazanacağıq. Qol epizodlarını dəyərləndirməklə bağlı problemlərimiz var. Amma bu gün nəticə önəmli deyildi. İki hissəni 40 dəqiqə oynadıq və matçın 55-60 dəqiqəsi məni qane etdi. Daha sonra futbolçularda yorğunluq hiss etdim”.

Mütəxəssis komandasının səkkiz aparıcı futbolçusunun meydanda olmadığını vurğulayıb:

“Bu baxımdan ciddi problemlər yaşayırıq. Təəssüf ki, bəzi oyunçularımız yalnız 2-3 aydan sonra komandaya qayıdacaqlar. Bir neçə gün əvvəl məşq zamanı zədələnən Bayere Lounu da itirdik. O, iki ay meydana çıxa bilməyəcək. Hücum xəttində xüsusi problemlərimiz var".

R.Sadıqov Azərbaycan millisinin Lixtenşteynlə heç-heçədən sonra ciddi tənqid olunmasına da münasinət bildirib:

“Mən uzun illər milli komandada oynamışam. Qələbə olmayanda komanda tənqid edilir. Qol vurmaq üçün çoxlu imkanlar var idi. Bu imkanlardan istifadə edə bilməyəndə futbolçularda stress yaranır. Litva ilə oyun çox vacib olacaq. İnanıram ki, milli komanda qalan iki oyunda qələbə qazanacaq və qrupda birinci yeri tutacaq”.