Əli Qurbani: "Azərbaycan yığmasında oynamağa hazıram"

"Baş məşqçi bütün oyunlarımı izlədikdən sonra klubumun meneceri ilə danışdı və məni yığmaya dəvət etdi. İran yığmasında oynamaq imkanım olmadığı üçün bu təklifi müsbət qarşlayaraq qəbul etdim".

Futbolxeber.az saytının məlumatına görə, bu fikirləri "Sumqayıt"ın futbolçusu Əli Qurbani Azərbaycan millisinə çağırılması barədə danışarkən deyib.

Cənubi azərbaycanlı hücumçu yığmada oynamaq üçün bütün sənədlərinin hazır olduğunu bildirib: "Mənə Azərbaycan pasportu veriblər. Hazırda ikili vətəndaşlığım var və bu yığmada oynaya bilərəm. Bu, mənim İranı tərk etməyim demək deyil".

Azərbaycan Premyer Liqasını İran çempionatı ilə müqayisə edən 30 yaşlı forvard buradakı klubların yaxşı infrastruktura sahib olduğunu söyləyib: "Liqanın səviyyəsi yaxşıdır. Klublarda hər cür şərait var. İdman obyektləri, oyun və məşq meydanları, paltardəyişmə otaqları yaxşı vəziyyətdədir. Hansısa klubda çatışmazlıq olsa, onu oyuna buraxmırlar. Burada keyfiyyətli oyunçular çıxış edir. Komandalar taktiki cəhətdən yaxşı oyun göstərirlər. İranda isə şərtlər fərqlidir. Çempionatda daha çox komanda iştirak edir. Azərbaycan futbolundakı şərait oradakından yaxşıdır. Bu isə yarışın keyfiyyətinə təsir edir. Texnika və istedad baxımından iranlı futbolçular öndədirlər. Bu mənada, iranlı oyunçu istənilən liqada çıxış edə bilər".

"Sumqayıt"a keçidi barədə də danışan Premyer Liqanın bombardiri "Sepahan"dan ayrıldıqdan sonra ölkə xaricindən xeyli təklif aldığını vurğulayıb: "Vəziyyət elə gətirdi ki, qısa zamanda növbəti komandamı seçməli oldum. Hər şey çox ani baş verdi. Anlaşdıq və mən "Sumqayıt"a qoşuldum. Hətta mövsümün ortasında Yunanıstandan təklif almışdım. Amma həmin vaxt komandanı tərk edə bilmədim".

Qeyd edək ki, Əli Qurbani 5 turdan sonra 5 qolla Azərbaycan çempionatının ən sərrast futbolçusudur. Millimizin baş məşqçisi Canni De Byazi Cənubi azərbaycanlı futbolçunu Monteneqro və Kiprlə oyunlar üçün yığmaya dəvət edib ("Report").