"Simurq" "Bakı"yla oyunun hazırlıqlarını davam etdirir

Premyer Liqasının növbəti turunda "Bakı"nı qonaq edəcək "Simurq" bir günlük istirahətdən sonra hazırlıqlara start verib. Futbolxeber.az-ın klubun rəsmi saytına istinadən verdiyi məlumata görə, dünən axşam saatlarında "Şəfa" stadionunda növbəti məşqinə çıxan "sarı-qaralar" iki saata yaxın davam edən çalışmalara əvvəlcə qaçış və isinmə hərəkətləri ilə başlayıb. Daha sonra fiziki hazırlıq üzrə məşqçi Aleksandar Karakliçin rəhbərliyi altnda fiziki gücün artırılmasından ibarət tapşırıqlar yerinə yetirilib. Məşqin əsas hissəsində isə baş məşqçi Georgi Çixradzenin nəzarəti altında topla taktiki və texniki təmrinlər yerinə yetirilib. İkitərəfli oyunla isə hazırlıq tamamlanıb.

Bir müddətdir zədədən əziyyət çəkən Rövşən Əmiraslanov artıq hazırlıqlara qoşulub. Ancaq "Neftçi"lə oyunda zədələnən Tural Axundov hələ də ayağında yüngül ağrılar hiss etdiyindən komandadan ayrı məşq edir. Onun "Bakı" ilə görüşdə meydana çıxıb-çıxmayacağı həkimlərin qərarından asılı olacaq.