"Bakıda qalib gəlmək əla olardı"

Sabah Avroliqanın play-off mərhələsinin ilk oyunu çərçivəsində Bakıda "Qarabağ"ın qonağı olacaq "Ayntraxt"ın qapıçısı Kevin Trapp qarşıdakı oyun haqda danışıb. Futbolxeber.az-ın məlumatına görə, Almaniya mətbuatına verdiyi açıqlamada 23 yaşlı qolkiper paytaxtımızda qələbə qazanmağa çalışacaqlarını qeyd edib: "Bizi Bakıda nə gözlədiyini heç kim bilə bilməz. Amma “Qarabağ”la oyunu səbirsizliklə gözləyirik. Biz sübut etməliyik ki, doğru yolda olan yaxşı komandayıq. “Qarabağ”ı Bakıda məğlub etmək əla olardı. Orada 0:0 hesablı heç-heçə də pis nəticə sayılmaz. Amma əgər rəqibimizə iki-üç qol vursaq, hər şey qaydasına düşəcək".

Qeyd edək ki, 23 yaşlı qapıçı 2012-ci ildən "Ayntraxt"da forma geyib. O, Frankfurt təmsilçisinin heyətində 26 matçda çıxış edir. Trapp eləcə də Almaniyanın U-21 millisinin şərəfini qoruyur.