Sənan Qurbanov: “Komanda öz yerinə qayıdacaq, söz verirəm”

"Qəbələ”nin baş məşqçisi Sənan Qurbanov Topaz Premyer Liqasının 5-ci turunda "Qarabağ”a səfərdə 1:4 hesabı ilə uduzduqları oyundan sonra mətbuat konfransı keçirib. Futbolxeber.az saytının məlumatına görə, o, əvvəlcə görüşlə bağlı fikirlərini açıqlayıb:

- Uğursuzluq zolağından çıxa bilmirik. Oyunun gedişatında hansısa inkişaf olsa da, bunu heç kəs qəbul etməyəcək. Komandamızdan hamı qələbə gözləyir. "Qarabağ” bu cür səhvləri bağışlamır. Çox üzgünəm. Cəzalandırılmalı insanlar cəzalanacaqlar. Bu komanda öz yerinə qayıdacaq. Buna söz verirəm.

- Liderdən 9 xal geridəsiniz. Çempionluq iddianız davam edir?

- Biz mübarizəmizi aparırıq.

- "Qarabağ” neçənci heyətlə meydana çıxmalıdır ki, xal qazana biləsiniz?

- "Qarabağ”da ikinci heyət yoxdur. Onların hər bir futbolçusu yüksək səviyyəlidir.

- Uğursuzluğun səbəbkarı kimdir?

- Baş məşqçi mənəm və məsuliyyət də mənim üzərimə düşür.

- Tərlan Əhmədovun baş məşqçi vəzifəsinə  gətiriləcəyi barədə yayılan xəbərlər işinizə mane olmur?

- Uzun illərdir bu komandadayam. Rəhbərlik hansı qərarı versə, buna hörmətlə yanaşacağam. "Qəbələ” üçün ən xeyirlisi nədirsə, o da olsun.