"Bakı"da keçirdiyim il yarımı karyeram üçün uğursuz hesab edirəm"

"Bakı"nın sabiq futbolçusu Duje Bakoviç Futbolxeber.az saytına müsahibə verib.

- "Bakı"dan getdikdən sonra karyeranızda nə kimi yenilik var?

- "Bakı"dan ayrıldıqdan sonra klubsuz qaldım. Çünki mən komandanı tərk edərkən artıq transfer pəncərəsi bağlanmışdı. Öz üzərimdə çalışıram. Dayanmadan fərdi məşqlər edirəm. Qarşıdakı günlərdə yeni klubum müəyyənləşməlidir.

- Hansısa komanda ilə danışıqlar aparırsan?

- Hazırda ABŞ-ın "Los Anceles Qelaksi" klubu ilə danışıqlar aparıram. Məsələ tezliklə həll olunmalıdır. Qarşıdakı günlərdə keçidin baş tutub-tutmayacağı müəyyənləşəcək.

- Bəs, "Bakı"nı nəyə görə tərk etdin?

- Ona görə ki, oynamırdım. Baş məşqçi mənə şans vermirdi, vaxtımı əsasən ehtiyat oyunçular skamyasında keçirirdim. Bu vəziyyət də məni razı salmırdı. Ona görə də komandadan getdim.

- Bojidar Bandoviçdən soruşmadın ki, nəyə görə sənə şans vermir?

- Yox, bu barədə ondan heç nə soruşmadım.

- Maraqlıdır, niyə oynamamağının səbəbini soruşmadın? Adətən futbolçular bu cür hallarda məşqçi ilə danışmağa üstünlük verirlər...

- Düzdür. Amma mənim Bandoviçlə münasibət yaxşı deyildi. Bu səbəbdən də ondan heç nə soruşmadım.

- Problem nədə idi?

- Ciddi problem yox idi. Sadəcə, münasibətlərimiz pis idi.

- Bandoviç artıq "Bakı"nı tərk edib. Bundan xəbərin var?

- Yox, bu haqda ilk dəfədir ki eşidirəm.

- "Bakı" mövsümü titulsuz başa vurdu. Komanda avrokuboklardan kənarda qaldığına görə rəhbərlik də onunla vidalaşamaq qərarına gəldi.

- Anladım.

- Problemin Bandoviçlə idi və o artıq komandanı tərk edib. Bu, səni "Bakı"ya qaytara bilər?

- Komandadan heç kim mənə zəng vuraraq, komandaya qayıtmalı olduğumu deməyib.

- "Los Anceles Qelaksi"yə keçidin nə dərəcədə realdı?

- Görəcəyik. Məsələ tezliklə həll olunmalıdır.

- "Bakı"da nə qədər çıxış etdin?

- 1 il 6 ay.

- 1 il 6 ayı özün üçün itirilmiş hesab edirsən?

- Bakıda yaşamaq xoş idi. Amma təəssüf ki, futbol baxımından bunu deyə bilməyəcəyəm. Orada keçirdiyim vaxtı karyeram baxımından özüm üçün uğursuz hesab edirəm. Demək olar ki, karyeramın il yarımını boşa verdim.

- Ümumi Azərbaycan futbolunun səviyyəsi barədə nə düşünürsən?

- Azərbaycanda futbolun səviyyəsi yaxşıdır. Eləcə də ölkənizdə xeyli sayda gənc və perspektivli futbolçular var. Buna görə də düşünürəm ki, Azərbaycan futbolu qısa zaman kəsiyində daha da irəli gedəcək.

Elman MƏHƏRRƏMOV