2 aya 1 oyunu təşkil edə bilməyənlər, Avropa çempionatını necə keçirəcəklər? YAZI

AFFA yenə qeyri-adi qərarı ilə hər kəsi təəccübləndirdi. Söhbət dünya derbisinin ("Beşiktaş"lılar bu ifadəni qəbul etməsələr də, belədir) Bakıda keçirilməməsindən gedir. Halbuki hər kəs Türkiyə superkuboku uğrunda oyunun - möhtəşəm "Qalatasaray" - "Fənərbaxça" derbisinin paytaxtımızda keçiriləcəyinə inanırdı. Əvvəlki illərdən fərqli olaraq, bu dəfə məsələ daha ciddi idi və türk qardaşlarımız bizim federasyona məktub da göndərmişdilər. Gəl ki, AFFA qarşı tərəfin təklifini qəbul etmədi.

Bu qərarı anlamaq çətindir. Axı, bu cür təklifdən necə imtina etmək olar? AFFA-da oturanlar hansı əsasla azarkeşləri bu cür futbol bayramından məhrum etdilər? Suallar çoxdu, cavab isə yoxdu. İndi Elxan Məmmədov çıxıb, sevimli saytlarına min bir bəhanə gətirəcək. Amma bu qərarın bircə adı var - biabırçılıq. Görəsən, AFFA-dakılar istəmirdilər ki, onların bəh-bəhlə tikib, ərsəyə gətirdikləri avropasayağı "Tofiq Bəhramov"u bütün dünyada görsünlər? "Bəyin oğurlanması"nda deyildiyi kimi, "düz deyirsiz, sizi elə görməsələr" yaxşıdır...

Amma dərindən düşünəndə AFFA-nı anlamaq mümkündür. Millimizin və ya ölkə çempionatının hansısa oyununda "Tofiq Bəhramov"un dolduğunu görmüsüz? Təbii ki, yox. Amma həmin oyunda stadion tam dolacaqdı. AFFA-dakılar da paxıllıqlarından partlayacaqdılar. Hətta azarkeşləri də qınaq obyektinə çevirəcəkdilər ki, öz oyunumuza gəlmirlər, amma türklərin superkubokuna gör necə qaça-qaça gəlirlər...  

AFFA-nı qınamayın, gözləri qorxub. Düşünürlər ki, bu dəfə də "Qalatasaray"ın "oxrana"ları "Fənər"in futbolçularını döyəcəklər. Sonra gəl, bu qalmaqalın altından çıx görüm, necə çıxırsan...

Ən gülməlisi isə AFFA-nın saytındakı izahatdı. Kişilər oyundan imtina etmələrini "vaxt məhdudiyyəti" ilə əlaqələndirirlər. Bu cümləni oxuyanda görüşün tarixini  səhv bildiyimi düşündüm. Dəqiqləşdirdim, yox, elə avqustun 11-dədi. Bu gün isə iyunun 3-dü. Deməli, görüşə 2 aydan da artıq vaxt qalıb. 2 aya 1 oyuna hazırlaşmaq çoxmu çətindir, hörmətli AFFA rəsmiləri? Təbbi ki, yoxxx.

Anlamadığım başqa bir məqam. 2 aya 1 superkubok oyununa hazırlaşa bilməyənlər Avropa çempionatını necə təşkil edəcəklər? Türkiyə Superkubokuna 2 ay qalmış "vaxt məhdudiyyəti"ni bəhanə gətirənlərin  qitə birinciliyinə iddia etmələri ABSURDdu.

UEFA AFFA-nın saytındakı izahatı oxusa, bizimkilərin Avropa çempionatı keçirmək istəyinə "gedin, işinizlə məşğul olun" cavabını verər.

Şəxsi fikrimdir ki, bizimkilərin Avropa çempionatına iddia etməsi də yalnışdır. Çünki indiyə kimi bircə dəfə də olsun, nüfuzlu 1 oyuna ev sahibliyi etməyən şəhərə (və ya ölkəyə) hansısa mötəbər turnirin ev sahibliyinin həvalə olunmasını görmüsüz? Şəxsən, mən görməmişəm. Avropa çempionatını keçirmək istəyən federasiya (ölkə və ya şəhər) ilk növbədə heç olmasa Çempionlar Liqasının da olmasa, Avroliqanın final matçına ev sahibliyi etməlidir. Bu, mərhələ-mərhələ olan işdir. Elə bil ki, İngiltərənin üçüncü liqasında oynayan komanda birdən-birə Premyer Liqada çıxış etməyə icazə istəyir. Buna imkan verərlər? Təbii ki, bu, qeyri-mümkündür. İndi bizimkilər də Avroliqanın, Çempionlar Liqasının finalını qəbul etməmiş istəyirlər ki, Bakıda Avropa çempionatı keçirilsin. Bu, qeyri-realdı cənablar. Özünüzü UEFA-dakılara güldürməyin...

Elman MƏHƏRRƏMOV