PSJ yetirməsi ilə peşəkar müqavilə imzaladı

PSJ 18 yaşlı hücumameyilli yarımmüdafiəçi Adam Ayari ilə ilk peşəkar müqavilə imzalayıb.

Futbolxeber.az saytının məlumatına görə, klubun yetirməsi olan futbolçu ilə 2029-cu ilin iyununa qədər nəzərdə tutulan müqavilə bağlanıb.

Ayari 6 yaşından PSJ-nin akademiyasındadır. O, ötən mövsüm U-19 komandasında keçirdiyi 20 oyunda 7 qol vurub, 6 məhsuldar ötürmə verib və komandası ilə ardıcıl ikinci dəfə Fransa gənclər çempionluğunu qazanıb.

18 yaşlı yarımmüdafiəçi, həmçinin PSJ-yə 35 ildən sonra ilk dəfə Qambardella Kubokunu qazanmağa kömək edib. O, turnirin 6 matçında 7 qol və 3 məhsuldar ötürmə ilə yadda qalıb. Ayari UEFA Gənclər Liqasında isə 5 dəfə fərqlənib.

Qeyd edək ki, Adam Ayari Fransanın aşağı yaş qrupları üzrə milli komandalarında ümumilikdə 18 oyuna çıxıb və 3 qol vurub. Hazırda o, Fransanın U-19 millisinin üzvüdür.