DÇ-2026: “Pley-off”un püşkü atıldı

Bu gün 2026-cı ildə ABŞ, Meksika və Kanadada təşkil olunacaq dünya çempionatının Avropa zonası üzrə pley-off oyunlarının püşkü atılıb.

Futbolxeber.az saytının məlumatına görə, mərasim FİFA-nın mənzil qərargahında keçirilib.

Pley-off oyunlarında iştirak edəcək millilər qrup mərhələsində 2-ci yeri tutan 12 komanda, həmçinin Millətlər Liqasının 4 Liqa qalibidir (hansı ki, Avropa kvalifikasiyasında öz qruplarını 2-ci yerdən aşağıda başa vurublar).

Hər pley-off yolu iki yarımfinal cütlüyündən ibarətdir. Hər cütlükdə "səpələnmişlər" və  "səpələnməmişlər" səbətində yer alan bir komanda iştirak edir. 1-ci səbət komandası 4-cü səbət komandası ilə, 2-ci səbət komandası isə 3-cü səbət komandası ilə qarşılaşacaq.

Püşkün nəticəsinə əsasən, Türkiyə millisi pley-off-da Rumıniya komandası ilə görüşəcək. Bu cütün qalibi pley-off-un finalında Slovakiya - Kosovo cütünün qalibi ilə qarşılaşacaq. Türkiyə qalib gəlsə, pley-off-un final matçını səfərdə keçirəcək.

2026 Dünya Kuboku Avropa seçmələrinin pley-off cütləri belədir:

A yolu

İtaliya - Şimali İrlandiya qalibi / Uels - Bosniya və Herseqovina qalibi

B yolu

Ukrayna - İsveç qalibi / Polşa - Albaniya qalibi

C yolu

Türkiyə - Rumıniya qalibi / Slovakiya - Kosovo qalibi

D yolu

Danimarka - Şimali Makedoniya qalibi / Çexiya - İrlandiya Respublikası qalibi

Yarımfinallar 26 mart 2026-cı il, final oyunları isə 31 mart 2026-cı il keçiriləcək.