“Bakı-2015”: “Yarışa çıxanda dodaq boyamda problem yaşadım”

Avropa Oyunlarında start xəttinə çıxan ilk Azərbaycan idmançıları çıxışlarını qiymətləndiriblər. Futbolxeber.az-ın məlumatına görə, sinxron üzgüçülük üzrə debütlərin yarışında qüvvəsini sınayan Tatyana Nikitina və Yekaterina Valiulina dueti Bakı Su İdman Mərkəzinə toplaşan azarkeşlərdən məmnun qalıb.

Yarışla bağlı fikirlərini açıqlayan Valiulina böyük məsuliyyətdən həyəcanlandıqlarını, lakin onların çıxışını coşğu ilə qarşılayan tərəfdarların sayəsində bu çətinliyin öhdəsindən gəldiklərini qeyd edib: “Bu, bizim üçün çox böyük məsuliyyət idi və öhdəsindən gəlmək çox çətin idi. Lakin azarkeşlər bunu dəf etməyə kömək etdi”.

Duetlərin yarışı belaruslu Anna Şulyina və Dominika Tsıplakovanın çıxışı ilə başlayıb. Avropa Oyunlarının tarixinə ilk atletlər kimi düşən 17 yaşlı üzgüçülər mərhələ adlamaqla, əsas vəzifələrinin öhdəsindən gəldiklərini deyiblər.

Yarışdan öncə çox həyəcanlı olduğunu bildirən Tsiplakova birinci çıxış edəcəyini əvvəlcədən hiss etdiyini söyləyib: “Yuxumda görmüşdüm ki, kosmetikamla bağlı problemim var. Bundan əvvəl isə yarışa birinci çıxacağımı da görmüşdüm. Həqiqətən də yarışa çıxanda dodaq boyamda problem yaşadım” (apasport.az).