“Bakı birinci Avropa Oyunlarının keçirilməsi üçün layiqli yerdir”

Yunan-Roma üslubunda güləşçi, 31 yaşlı Stiq Andre Berqe Bakıda birinci Avropa Oyunlarının medalları uğrunda mübarizə aparacaq idmançılardan biridir. Andre dəfələrlə Avropa çempionatlarının mükafatçısı olub. 2014-cü ildə isə dünya çempionatının bürünc medalını qazanıb.

S.A.Berqe “Azərtac”a eksklüziv müsahibəsində bildirib ki, birinci Avropa Oyunlarına dünya və Avropa çempionatlarına hazırlaşdığı kimi hazırlaşır. O deyib: “Mən Bakıdakı Oyunlara tam hazıram, çünki son altı ayda gecə-gündüz məşq etmişəm”.

Norveçli idmançı rəqibləri barədə deyib: “Mənim çəki dərəcəmdə Bolqarıstan və Rusiyadan peşəkar idmançılar var. Güclü rəqabət olacaq. Əlbəttə, Azərbaycandan olan güləşçilər də adətən çox güclüdürlər”.

S.A.Berqe “Birinci Avropa Oyunlarından nə gözləyirsiniz” sualına cavabında deyib: “Əminəm ki, Bakı birinci Avropa Oyunlarının keçirilməsi üçün layiqli yerdir. Mən müxtəlif yarışlarda iştirak etmək üçün dörd dəfə bu şəhərdə olmuşam və bilirəm ki, Azərbaycan ədalətli və yaxşı idman yarışları keçirmək üçün həmişə mümkün olan hər şeyi edir”.