“Bakı-2015”: Boks üzrə millimizin heyəti açıqlanıb

Birinci Avropa Oyunlarında iştirak edəcək boks üzrə Azərbaycan milli komandasının heyəti müəyyənləşib. Futbolxeber.az-ın “Azərtac”a istinadən verdiyi məlumata görə, millimiz kişilərin yarışında 10 idmançı ilə təmsil olunacaq. Avropa çempionu, Olimpiya Oyunlarının mükafatçısı Teymur Məmmədov bu dəfə fərqli çəki dərəcəsində - 81 kiloqramda çıxış edəcək. Yarışda 91 kiloqram çəki dərəcəsində isə Abdulqadir Abdullayev rinqə çıxacaq.

Dünya çempionu Albert Səlimov milli komandamızın heyətində ilk ciddi sınağını məhz Avropa Oyunlarında verəcək. “Baku Fires” klubunun heyətində “Rio-2016” Olimpiadasına vəsiqə qazanan boksçu 60 kiloqram çəki dərəcəsində mübarizə aparacaq. Məşqçilər korpusu 56 kiloqramda “Böyük İpək Yolu” turnirində birinci olan gənc idmançı Tayfur Əliyevə şans verib. Komandamız hazırda Bakıda İrlandiya və Bolqarıstan boksçuları ilə birgə təlim-məşq toplanışı keçir.

Heyətə, həmçinin Salman Əlizadə (49 kq), Elvin Məmişzadə (52 kq), Lorenzo Sotomayor (64 kq), Pərviz Bağırov (69 kq), Xaybulla Musalov (75 kq) və Məhəmmədrəsul Məcidov (91 kq-dan yuxarı) daxil edilib.

Qızların yarışında 5 boksçumuz çıxış edəcək. Dünya çempionatının gümüş mükafatçısı, Avropa çempionu Yelena Vıstropova (64 kq), dünya çempionatının finalçısı Yana Alekseyeva (60 kq) əsas medal ümidlərimiz olacaq. Bundan başqa, Anaxanım Ağayeva (51 kq), Anna Əlimərdanova (54 kq) və Zeynab Cavadlı (75 kq) da “Baku Crystal Hall”da rinqə çıxacaqlar.