Elşad Quliyev: “Deməzdim ki, Bəhreynə qarşı pis oynadıq”

“Əvvəldən də demişdim ki, ilk oyun çox çətindir. Evdə oynayırdıq. Meydança amili də var idi. Rəqiblər də bizə qarşı güclü hazırlaşırlar. Artıq bu oyun geridə qaldı. Növbəti oyunlara baxacağıq. Uğurlu nəticə qazanaraq qrupdan birinci çıxmaq istəyirik”.

Futbolxeber.az saytının məlumatına görə, bu sözləri Bakıda keçirilən dünya çempionatındakı ilk matçında Bəhreynlə bərabərə qalan minifutbol üzrə milli komandamızın baş məşqçisi Elşad Quliyev deyib.

Mütəxəssis 3 il əvvəl qalib olduqları Avropa çempionatına da uğursuz start verdiklərini xatırladıb: “Avropa çempionu olan vaxtı da ilk matçda rumınlara uduzmuşduq. Sonradan yığışıb daha yaxşı oynadıq. Deməzdim ki, Bəhreynə qarşı pis oynadıq. Yaxşı çıxış etdik, epiozodlarımız oldu. Öz səhvimizdən qol buraxdıq. Vaxtımız var, işləyəcəyik. Daha yaxşı hazırlaşıb, qələbə qazanmaq istəyirik”.

Mütəxəssis sonuncu dəfə bir il əvvəl "Zirə"nin heyətində görünən Ramiz Çovdarovun sürpriz şəkildə milliyə dəvət edilməsinə də münasibət bildirib: “Ramiz Almaniyada yaşayır, orada oynayır. Bizə lazımlı oyunçudur, solaxay futbolçudur. İnanıram ki, özünü yaxşı tərəfdən göstərəcək”.