Elşad Quliyev: “Evdə dünya çempionatında oynamağın yükü ağırdır”

“Federasiya bizim üçün hər cür şərait yaradıb. Biz də yaxşı hazırlaşmışıq. Komandamız tam hazırdır. Evdə oynamağın yükü ağırdır. Məsuliyyət ikiqat olur. Hər şey birinci oyundan asılıdır. Yaxşı start demək olar ki, dünya çempionatında daha uzağa getmək üçün vacib rol oynayacaq”.

Futbolxeber.az saytının məlumatına görə, bu sözləri minifutbol üzrə Azərbaycan milli komandasının baş məşqçisi Elşad Quliyev Bakıda keçiriləcək dünya çempionatından öncə təşkil olunan mətbuat konfransında deyib.

O, ötən mundialda komandanın psixoloji cəhətdən problem yaşamadığını bildirib: “Deməzdim ki, ötən dünya çempionatında psixoloji tərəfdən uduzduq. Belə demək doğru olmazdı. Dünya çempionatında ilk dəfə iştirak etsək də, yaxşı hazırlaşmışdıq. Futbol səhvlərin üzərində qurulan oyundur. Fərdi səhvlərdən finala çıxa bilmədik. İki il keçib. Bunun üzərində çalışmışıq ki, səhvlər azalsın. Səhvlərin azalması yaxşı nəticə qazanmağımıza kömək edəcək. Psixoloji tərəfdən də hazırıq. BƏƏ-də də hazır idik. Udduğumuz matçı uduzduq”.