“Ferentsvaroş”un baş məşqçisi: “Qarabağ” elə intensiv futbol oynadı ki...”

Macarıstanın “Ferentsvaroş” klubunun baş məşqçisi Borbeli Balaj “Qarabağ”a qarşı keçirdikləri yoxlama oyununu dəyərləndirib.

Futbolxeber.az-ın məlumatına görə, o, Avstriyadakı təlim-məşq toplanışı çərçivəsində Ağdam təmsilçisi üzərində 1:0 hesablı qələbədən sonra fikirlərini klubun saytına açıqlayıb.

“Ağır meydançada güclü rəqibə qarşı oynadıq. Futbolçular böyük mübarizə apardılar və onların yanaşmasından çox razı qaldım. Bu, bizim üçün faydalı hazırlıq oyunu oldu. Çünki “Qarabağ” matçın müəyyən hissələrində elə intensiv futbol oynadı ki, beynəlxalq arenada bununla mütəmadi qarşılaşacağıq.

İlk 10 dəqiqə bizim üçün uğurlu keçmədi. Daha sonra təşəbbüsü ələ aldıq və ilk hissənin sonuna qədər oyuna nəzarət etdik. Qolu da layiqincə vurduq. İkinci hissədə həm hücumda, həm də müdafiədə daha yaxşı çıxış etdik. Məşqlərdə üzərində işlədiyimiz bir çox elementləri meydanda gördük. Əlbəttə, hələ düzəltməli olduğumuz səhvlər var.

Nəticəyə sevinirəm. Amma bundan da vacibi odur ki, oyun baxımından irəliləmişik. Şans qazanan futbolçular da bundan yaxşı istifadə etdilər. Komandanın münasibətindən və əzmkarlığından razıyam, baxmayaraq ki, hələ inkişaf etməli olduğumuz məqamlar var”, - deyə Borbeli Balaj bildirib