Xarici saytlar AFFA-nın yalanını üzə çıxardı - FOTO FAKT

Türkiyənin İsparta şəhərində təlim-məşq toplanışında olan 21 yaşadək futbolçulardan ibarət Azərbaycan milli komandası dünən ilk yoxlama oyununa çıxıb. Bəhreynlə qarşılaşan yığmamız 3:0 hesablı qələbə qazanıb.

Futbolxeber.az-ın məlumatına görə, AFFA-nın saytı U-21 millimizin bəhreynli həmyaşıdları ilə qarşılaşdığını yazıb. İstər oyunla bağlı xəbərdə, istərsə də matçdan hazırlanmış fotosessiyada rəqib qismində Bəhreynin U-21 millisi təqdim edilib. Əslində isə Azərbaycan yığması Bəhreynin U-21 deyil, U-20 millisi ilə qarşılaşıb. Bu məqam “fləşskor” (flaschore.com, flashfootball.com), “livskor” (livscore.com) kimi portallarda qeyd olunub. Xarici saytlar yığmamızın Bəhreynin U-20 millisi ilə qarşılaşdığını yazıb. Həmin komandanın əvvəlki və sonrakı matçlarına diqqət etdikdə də AFFA-nın yalan məlumat yaydığı üzə çıxır. Belə ki, Bəhreynin U-20 millisi bundan 3 gün əvvəl – iyunun 3-də Qırğızıstanın U-20 millisi ilə qarşılaşıb və rəqibinə 0:4 hesabı ilə uduzub. Eləcə də komandanın növbəti sınağı Asiya U-20 Kubokunun seçmə mərhələsi olacaq. Bəhreynin U-20 millisi 31 avqust-6 sentyabr aralığında Tacikistan, İordaniya və Əfqanıstanın U-20 yığmaları ilə qarşılaşacaq.

Görünür, AFFA-nın saytı rəqib komandanın yaşını artırmaqla millimizin qələbəsini şişirtməyə cəhd edib. Lakin buna nə ehtiyac var? Adı üstündə, bu, yoxlama oyunudur...