Sessi D’Almeyda: "Neftçi"nin problemi məhz budur"

“Neftçi”nin yarımmüdafiəçisin Sessi D’Almeydanın Futbolxeber.az saytına müsahibəsi

- Hamı “Sumqayıt” üzərində qələbənin ardının gələcəyini düşünsə də, “Karvan”la görüşdə yenə qələbə qazanmadınız. Qolsuz heç-heçəni nə ilə əlaqələndirmək olar?

- Çox yaxşı oyun keçirdiyimizi düşünürəm. Sadəcə yenə də yaxaladığımız epizodları qola çevirə bilmədik. Bitiriciliklə bağlı problem bu dəfə də qələbə qazanmağımıza mane oldu. Bizim problemimiz məhz budur. Məşqlərdə bunun üzərində çox çalışmalıyıq.

- Oyun baxımından “Neftçi”nin axsadığını demək olmaz...

- Bəli, oyunumuz əladır, topa nəzarət edirik, rəqibi təzyiq altında saxlayırıq, təhlükəli vəziyyətlər yaradırıq, qapıya zərbələr vururuq. Bircə qalır qol vurmaq. Onu da bacarsaq, hər şey yaxşı olacaq.

- Artıq 6 tur geridə qalıb. Bu müddətdə “Neftçi” nə üçün hücumdakı problemi həll edə bilmir?

- Çox yaxşı sualdır... Bunun üzərində işləyib, növbəti oyuna qədər həll etməyə çalışacağıq. Məşqlərdə əsasən bitiricilik üzərində çalışmalıyıq.

- 6 oyunda 11 xal itirmisiniz. Çox deyil?

- Ötən oyunlar keçmişdə qalıb. Bundan sonra nə etsək də, xalları geri qaytara bilməyəcəyik. Qarşıda bizi potensial 3 xal gözləyir. Meydanda hər şey etməliyik ki, xalların sayını artıraq. Bura qədər itirdiyimiz xallar kifayətdir. Bundan sonra qələbələri sıralamalıyıq.

- Belə təəssürat yaranır ki, “Neftçi” iddialı komandalara qarşı daha rahat oynayır, nəinki qapanan rəqiblərə qarşı. Bu məntiqlə qarşıdakı turlarda “Zirə” və “Araz-Naxçıvan”la görüşlərdə yaxşı nəticəyə ümid etmək mümkündür?

- Sizinlə razılaşmaya bilmərəm. “Karvan” tipli komandalar əsasən müdafiənin qayğısına qalmaqla əks-hücumlara bel bağlayır. Rəqib böyük qüvvə ilə geri çəkiləndə müdafiəni yarmaq çətinləşir. Lakin istənilən halda bu cür komandalara qol vurmağın yollarını tapmalıyıq. Çünki mövsüm ərzində belə oyunlar çox olacaq.

- “Neftçi” orta xəttə yeni transfer gerçəkləşdirdi. İfeanyi Metyunun gəlişi sizi narahat etmir?

- Mənim üçün heç bir narahatlıq yoxdur. Rəqabətdən çəkinmirəm. Yeni futbolçuların gəlişi bizim üçün faydalıdır. Ümid edirəm ki, Metyu öz oyunu ilə komandamıza kömək edəcək, fayda verəcək.

- Formasını geydiyiniz Benin millisi seçmə mərhələnin sonuna iki tur qalmış ikinci pillədədir. DÇ-2026-ya yollanmaq şansınızı necə dəyərləndirirsiniz?

- Hazırda qrupda ikinci yerdəyik. Birinci pillədən 3 xal geri qalırıq. Qeyd etdiyiniz kimi, sona 2 tur qalıb. Həmin matçlarda lazımi nəticəni qazansaq, şansımız xeyli yüksələcək. Birinci olsaq, mundiala birbaşa vəsiqə əldə edəcəyik. İkinci yeri tutsaq, pley-offda çıxış edəcək. Hər bir futbolçu kimi, mən də dünya çempionatında oynamağı çox istəyirəm.

TAĞI