Tsxadadzenin imtina etdiyi futbolçu: “İstədim-istəmədim mövsümün sonuna kimi “İnter”dəyəm”

“Hazırda Bakıdayam. Formadan düşməmək üçün “İnter”in əvəzedici komandasında gündə iki dəfə məşq edirəm”. Futbolxeber.az saytına verdiyi açıqlamada bu sözləri millimizin sabiq üzvü Elhad Nəziri deyib.

Baş məşqçi Kaxaber Tsxadadzenin qərarına əsasən “İnter”lə birgə Antalyaya təlim-məşq toplanışına aparılmayan gənc müdafiəçi mövsümün sonuna kimi “bankirlər”dən ayrılmayacağını bildirib: “Əsas komandadan kənarda qalmağıma baxmayaraq, başqa kluba keçməyəcəyəm. İstədim-istəmədim mövsümün sonuna kimi “İnter”dəyəm. Qaydalara əsasən mövsüm ərzində 2-dən artıq klubda oynamaq olmaz. “İnter” isə mənim cari mövsümdə artıq ikinci komandamdır. FİFA-nın qanunlarına əsasən məcburən mövsümü “İnter”də başa vurmalıyam. Əlbəttə, qaydalarn imkan versəydi, başqa kluba keçərdim. Oynamadığım yerdə niyə qalmalıyam ki?”