Azər Salahlı: “Arxayınlaşmaq olmaz”

“Tovuz səfəri hər zaman çətin olur. Fərqi yoxdur “Kəpəz”lə oynayırsan, ya “Turan Tovuz”la. Bu gün də ağır matç oldu. Düşünürəm ki, yaxşı oyun sərgilədik, yaxşı nəticə qazandıq. Lakin arxayınlaşmaq olmaz. Bu, hələ birinci hissədir. Cavab oyununda hər şey məlum olacaq. Artıq bu görüşü unudub qarşıdakı matçlara hazırlaşmalıyıq”.

Futbolxeber.az saytının məlumatına görə, bu sözləri “Neftçi”nin müdafiəçisi Azər Salahlı Azərbaycan kubokunun 1/4 final mərhələsinin ilk oyunu çərçivəsində səfərdə “Kəpəz”i 2:0 hesabı ilə məğlub etdikləri matçdan sonra deyib.

“Neftçi TV”yə danışan 31 yaşlı müdafiəçi öz çıxışından da söz açıb: “Uzun müddət zədəli oldum. Lakin bərpa dövrünü tez keçə bildim. Get-gedə formamı bərpa etməyə çalışıram. Zədədən sonra ilk oyunlar həmişə çətin olsa da, hiss edirəm ki, tezliklə daha yaxşı forma yığacam”.

Salahlı onları qarşıda sıx qrafik gözlədiyini vurğulayıb: “Ağır oyunlarımız olacaq. Çox yaxşı hazırlaşmalıyıq. Çünki 3-4 gündən bir meydana çıxacağıq”.