Samir Abasovdan qələbə şərhi: “Nəticə qazanmağın yolu budursa...”

“Bilirsiniz ki, kuboka necə köklənmişik. Bu məqsədi qarşımıza ümid və stimul kimi qoymuşuq. Səfər matçından qələbə ilə dönmək yaxşıdır. Lakin bu o demək deyil ki, sondur. Bugünkü matçda rəqibin şansları oldu. Onlar da fərqlənə bilərdilər, biz də böyükhesablı qələbə qazana bilərdik. Bu oyun nəticə baxımıdan bizə motivasiya verdi. “Neftçi” üçün kubokun əhəmiyyətini futbolçular da anlayırlar. Artıq bundan sonra çempionat oyununa hazırlaşacağıq”.

Futbolxeber.az saytının məlumatına görə, bu sözləri “Neftçi”nin baş məşqçisi Samir Abasov Azərbaycan kubokunun 1/4 final mərhələsinin ilk oyunu çərçivəsində səfərdə “Kəpəz”ə 2:0 hesabı ilə qalib gəldikləri matçdan sonra deyib.

Mütəxəssis komandasının ardıcıl iki matçda qapısını toxunulmaz saxlamasının səbəbini belə izah edib: “Neftçi”yə gəldiyimiz ilk gündən seriya yaxalaya bilmirdik. Demirəm indi hər şey əladır. Sadəcə o vəziyyətdən çıxış yolları axtarmağa başladıq. Bizə lazım olan, ən idealı oyunun içindəki nizam-intizamı yerinə oturtmaqdır. Bura daxildir rəqibə şans verməmək, sıx oynamaq, bir-birini sığortalamaq və s. Bu cür oyunun ən yaxşı nümunəsi “Sabah” və “Şamaxı” ilə oyunlar idi. İdeal vəziyyətdə olduğumuzu deməzdim. Bu gün çıxış yolu tapmalıyıq. Bəzi epizodlarda iki nömrə oynamaq yox, o situasiyaya düşəndə necə oynamalı olduğumuzun üzərində Qəbələdə hazırlaşdıq. Nəticə qazanmağın yolu budursa, üzərində dayanacağıq”.

S.Abasov Premyer Liqamızda legioner limitinin ləğvi və komanda sayının artırılması barədə düşünmədiyini vurğulayıb:  “Bu haqda Azərbaycan futbolunda danışılmayanda mən danışmışdım. Onda hələ Rüstəm (“Neftçi”nin media kordinatoru Rüstəm Əfsərlini nəzərdə tutur - red.) CBC Sport-da idi. Jurnalistlər bildirdilər ki, Samir Abasov elə şeylər deyir... Sanki Azərbaycan futbolunun müqəddəratını mən həll edirəm. Dünən qatarda yolda yenə eyni adamlar danışırdı. Mən bu haqda düşünmürəm. O qədər işimiz başımızdan aşıb-daşır ki. Kubok, indi qarşıdan çempionat matçı gəlir. O barədə fikirləşmirəm, heç fikirləşməyəcəm də. Nə qərar verilsə, ona uyğun da davranacağıq”.