Felipe Santos: “Bundan sonra bizim üçün hər oyun finaldır”

“Araz-Naxçıvan”ın yarımmüdafiəçisi Felipe Santosun Futbolxeber.az saytına müsahibəsi

- Azərbaycan Premyer Liqasının VIII turunda “Səbail” üzərində 3:2 hesablı qələbə qazandınız. Oyun barədə nə deyə bilərsiniz?

- Çətin oyun idi. Birinci hissəni pis keçirdik. Fasilə ərəfəsində qapımızda qol gördük. Lakin ikinci 45 dəqiqədə matçın gedişini dəyişə bildik və vacib qələbə qazandıq.

- Fasilədə baş məşqçi hansı dəyişiklikləri etdi ki, ikinci hissəyə fəal başladınız?

- Baş məşqçimiz bizimlə danışdı. Söylədi ki, hər şey özümüzdən asılıdır. İkinci hissədə xarakter göstərməli olduğumuzu dedi. Hamı əlindən gələni etdi. Elmar müəllim nəyə qadir olduğumuzu bilir. Hər dəfə deyir ki, bundan da artığını edə bilərik.

- Oyunun yerinin dəyişdirilməsi, süni qazon çıxınıza hər hansı təsir göstərdi?

- Bundan əvvəlki oyunu da süni meydançada keçirmişdik. Lakin belə şeyləri düşünməməliyik. Fikrimizdə yalnız döyüşmək və qalib gəlməkdir. Harda oynayırıqsa oynayaq, xarakter göstərməliyik.

- Ardıcıl 4-cü qələbə ilə ən azı bir günlük lidersiniz. “Araz-Naxçıvan”ın zirvədə qalması nə dərəcədə realdır?

- Bu, çox çətindir. Çünki çempionatda yaxşı komandalar çoxdur. Hər oyun bizim üçün finaldır. Yekunu isə mayda görəcəyik

- Növbəti turda “Sabah”la qarşılaşacaqsınız. Həmin matçdan gözləntiləriniz nədir?

- Rəqib yaxşı komandadır. Yayda avrokuboklarda da çıxış edib. Çox çalışmalıyıq ki, istədiyimiz nəticəni qazanaq. Bizim üçün finaldır.

- Ardıcıl ikinci turdu fərqlənirsiniz. Çıxışınızdan nə dərəcədə razısınız?

- Tam da olmasa, razıyam. Hiss olunur ki, komandamız da inkişaf edir. Baş məşqçimiz mənə çox inanır. Bu amil məndə sakitlik yaradır ki, öz oyunumu göstərə bilim. Amma çıxışımı daha da yaxşılaşdırmalıyam. Dediyiniz kimi, ardıcıl ikinci matçdır fərqlənirəm. Bundan sonra da əlimdən gələni edəcəm ki, komandama faydalı olum.

Fərəc Aslanov