Elxan Məmmədov üçün əlamətdar gün

Bu gün AFFA-nın keçmiş baş katibi, son 2 ildə FİFA-nın Avropa Milli Assosiasiyaları Departamentinin direktoru vəzifəsini tutan Elxan Məmmədov üçün əlamətdar gündür.

Futbolxeber.az saytının məlumatına görə, E.Məmmədovun 45 yaşı tamam olur.

Elxan Məmmədov 18 iyun 1979-cu ildə Bakıda anadan olub.

1999-cu ildə Amerika InterContinental Universitetində (London, Böyük Britaniya) Biznesin İdarəedilməsi və Korporativ İdarəetmə ixtisası üzrə bakalavr dərəcəsi alıb.

2011-ci ildə Liverpul Universiteti tərəfindən təşkil edilən Futbol Klubları və Assosiasiyaların İdarəçiliyi üzrə Təlimdə iştirak edib. O, həmçinin 2012-ci ildə Salford Universitetində (Mançester, Böyük Britaniya) İdarəetmə Planlaşdırması ixtisası üzrə aspirantura təhsilini başa vurub.

2016-cı ildə Parisdə Sciences Po İnstitutunun əməkdaşlığı ilə təşkil edilən Avropa İdman İdarəetmə (European Sport Governance (MESGO) proqramını bitirib.

Elxan Məmmədov 2007-2022-ci illər ərzində AFFA-nın Baş katibi, UEFA Avropa Liqası Finalının 2019-cu ildə Bakı şəhərində keçirilməsi üzrə əlaqələndirici, 2020-ci ildə UEFA Avropa çempionatının 4 oyununun Bakı şəhərində keçirilməsi üzrə Yerli Təşkilat Komitəsinin sədr müavini, FIFA Fair Play və Sosial Məsuliyyət Komitəsinin üzvü, UEFA-nın Fair Play və Sosial Məsuliyyət Komitəsinin vitse-prezidenti, 29 may 2019-cu ildə isə həmin komitənin sədri seçilib. O, 2009-2012-ci illər ərzində UEFA nümayəndəsi kimi də fəaliyyət göstərib.

E.Məmmədov beynəlxalq idman tədbirlərinin Azərbaycanda keçirilməsi üzrə müxtəlif komitələrin üzvü və sədri olub. 2016-cı ildə təşkil olunmuş 17 yaşadək oğlanlardan ibarət komandalar arasında Avropa çempionatının Yerli Təşkilat Komitəsinin sədri olub, AVRO-2020-nin oyunlarının Bakı şəhərində keçirilməsi üçün namizədliyin irəli sürülməsi və prosedur işlərin həyata keçirilməsi prosesinə rəhbərlik edib.

2013-cü ildə AFFA qadın və qızlar futbolunun inkişafı və təbliğinə verdiyi töhfəyə görə Beynəlxalq Olimpiya Komitəsinin Qadın və İdman Nailiyyətləri diplomu ilə təltif olunub.

2016-cı ilin oktyabrın 4-də Elxan Məmmədov Londonda "Leaders Under 40 Awards" illik mükafatının idman sahəsində "Liderlik" kateqoriyası üzrə mükafata layiq görülüb.

18 dekabr 2017-ci il tarixində Azərbaycan Respublikasının Prezidenti cənab İlham Əliyev Elxan Məmmədova Azərbaycan Respublikası Prezidentinin fəxri diplomunu təqdim edib.

Yubileyi münasibəti ilə E.Məmmədovu təbrik edir, uzun ömür, cansağlığı, gələcək fəaliyyətində uğurlar arzu edirik.