Şahin Diniyev: “Avrokuboklara getməmək dünyanın sonu deyil”

“Rəqib qapıçı Yusif İmanovu təbrik edirəm. Oyunun qalibi o idi. Yüz faizli 5 qol imkanından istifadə edə bilmədik və 2 yarım epizoddan qol buraxdıq. Komandama təşəkkür edirəm”.

Futbolxeber.az saytının məlumatına görə, bu sözləri "Səbail"in baş məşqçisi Şahin Diniyev Azərbaycan Premyer Liqasının 32-ci turunda səfərdə "Sabah"a 0:2 hesabı ilə uduzduqları oyundan sonra keçirilən mətbuat konfransında deyib.

Təcrübəli mütəxəssis yenilgiyə baxmayaraq, "Səbail"in avrokuboklar mübarizəsindən qopmadığını bildirib: “Qarşıda 12 xal var. Mübarizədən qopsaq, belə bu, heç nəyi həll etmir. Yeni komandayıq. Avrokuboklara getməmək dünyanın sonu deyil”.

“Yusif İmanovu təbrik etdiniz. Bəlkə bir az da öz hücumçularınızı qınayasınız?” sualını Diniyev belə cəzalandırıb: “Bəli, daha yaxşı vura bilərdilər. Amma qapıçının çıxışı möhtəşəm idi. Qol epizodlarını yaradan da bu komandadır”.

“Səbail”in çalışdırıcısı sərəncamındakı qolkiperlərdən razılıb edib: “Mənim qapıçılarım var, onlardan razıyam. Sadəcə bugünkü oyunun qəhrəmanı Yusif idi. Onun da zəif oyunları olub. "Sabah"ın qələbəsinə kölgə salmaq istəmirəm. Yarım epizoddan qol vura bildilər. Bu da məşqçinin və futbolçuların əməyidir”.

Diniyev qeyd edib ki, futbolda uğur qazanmaq üçün 3 amil vacibdir: “Stabil heyət, stabil oyun, stabil nəticə. Futbol bunların üzərində qurulub. Üçündan biri olmayanda nəticəni ala bilmirsən. 7 ayın komandasıyıq. Bu gün ötənilki heyətdən bir nəfər belə meydanda yox idi. Zamana ehtiyac var”.