İvan Brkiç: “Neftçi”nin şərəfi uğrunda canımızı meydanda qoymalıyıq”

“Deməyə söz tapmıram. Matç olduqca ağır keçdi”.

Futbolxeber.az saytına müsahibəsində bu sözləri “Neftçi”nin qapıçısı İvan Brkiç “Qarabağ”a 1:4 hesabı ilə uduzduqları Azərbaycan kubokunun yarımfinal mərhələsinin cavab oyunu barədə danışarkən deyib.

Xorvatiyalı qolkiper bildirib ki, artıq bu məğlubiyyəti yaddan çıxarmalıdırlar: “İlk oyunda evdə 4 cavabsız qolla uduzmuşduq. Burdakı qarşılaşmanın da çətin olacağını bilirdik. Yenə də ilk matçdakı ssenari təkrarlandı və 4 qol buraxdıq. Artıq qarşıdakı matça baxmalı, bu oyun barədə hər şeyi unutmalıyıq. "Turan Tovuz"la matçda daha yaxşısını etməliyik”.

29 yaşlı qapıçı vurğulayıb ki, kubokda mübarizəni dayandırdıqdan sonra avrokuboklara vəsiqə qazanmaq üçün Premyer Liqa matçlarında döyüşməlidirlər: “Hazırda komandada işlər mükəmməl səviyyədə deyil. Möhkəm olub hər oyunda klubun şərəfi, azarkeşlərimiz uğrunda canımızı meydanda qoymalıyıq. Burada olan hər kəs bu uğuru qazanmağa layiqdir. Hər kəs "Neftçi" üçün çətin olacağını deyir, müxtəlif fikirlər səsləndirirlər. Bu komandanın adı üçün hər şey etməliyik”.

Brkiç 4 aylıq fasilədən sonra yaşıl meydanlara qayıdışını belə şərh edib: “Bu, olduqca uzun bir müddətdir. "Qarabağ"a qarşı çətin bir oyun keçirsəm də, yenidən meydanda olduğuma şadam. Yenidən özümdə güc tapa bilirəm. Tanrıya hər an mənim yanımda olduğu üçün şükür edirəm. Ayağımda bir qədər ağrılar hiss etsəm də, yenidən meydandayam, sağlamam. Deyə bilərəm ki, hər şey məşqlərdə olduğu kimi deyil. Oyunda bir qədər fərqli ssenari ilə qarşılaşmalı olursan”.

“Neftçi”nin qolkiperi Azərbaycan Premyer Liqasının 32-ci turunda "Turan Tovuz"a qarşı keçirəcəkləri matçda meydana çıxıb-çıxmayacağı barədə sualı belə cavablandırıb: “Həmin matçda meydana çıxıb-çıxmamağım baş məşqçinin qərarından asılıdır. Mən əsas qapıçı olmaqdan məmnunam. Həmin qarşılaşmada da oynasam, inkişafım üçün faydalı olar. Hər oyun ən yaxşısını etmək üçün meydana çıxacağam. Rza Cəfərov da əlindən gələni edir. Yoxluğumda onun çıxışını yüksək qiymətləndirirəm. Məşqlərdə də özümü yaxşı tərəfdən göstərməyə çalışıram. Özümə arxayınam. Yenidən meydana çıxsam, bu komanda üçün maksimum faydalı olacağam”.

Azad NURİYEV