"Flavinyo, Vobay, Kanales istənilən komanda üçün baş ağrısıdır"

"Artıq demək olar ki, bu məsələni unutmuşam. Təbii ki, ilk qolumu "Neftçi"yə vurmaq çox xoş bir duyğudur. Bu hər zaman xatirimdə qalacaq. Amma qeyd etdiyim kimi, bu artıq keçmişdə qalıb". Futbolxeber.az-ın məlumatına görə, bu sözləri "Qarabağ"ın futbolçusu Qara Qarayev klubun rəsmi saytına verdiyi açıqlamada deyib.

"Neftçi" ilə əvvəlki oyunda vurduğu qolla "Qarabağ"a qələbə qazandıran Qara Qarayev şənbə günü keçiriləcək növbəti oyun haqqında belə danışıb: "Neftçi"yə qarşı ciddi hazırlaşırıq. Amma bu digər oyun hazırlıqlarından elə də fərqlənmir. "Ağ-qaralar" uzun müddətdir məğlub olmur. Hazırda çox yaxşı formadadırlar. Bizə hər 2 oyunda məğlub olduqlarına görə meydana qisas hissiylə çıxacaqlar. Bunun üçün çox çalışacaqları bəllidir. Rəqibin heyətində kimisə fərqləndirmək çətindir. Çünki, "Neftçi" fərdi ustalığı yüksək oyunçulardan qurulub. Flavinyo, Vobay, Kanales istənilən komanda üçün baş ağrısıdır. Onları saxlamaq bizim üçün çətin olacaq. Hazırda "Neftçi"ni saxlamaq çox çətindir. Amma bu o demək deyil ki, biz meydana məğlub kimi çıxırıq. Təbii ki, 3 xal qazanmaq istəyirik. Bunun üçün də vuruşacağıq. "Qarabağ"da əla kollektiv var. Bir-birimizə daim dəstək oluruq. Aprelın 6-sında da sona qədər uğurlu nəticə üçün döyüşəcəyik".