Qurban Qurbanov: “Qarşımızda çox yaxşı “Qəbələ” var idi”

"Matçı sönük görmək olardı. Amma əsl kubok oyunu idi. Hər iki komanda qalib gəlmək istəyirdi. Qarşımızda çox yaxşı "Qəbələ" var idi. Bəlkə də qələbəyə layiq idilər".

Futbolxeber.az saytının məlumatına görə, bu sözləri "Qarabağ"ın baş məşqçisi Qurban Qurbanov Azərbaycan kubokunun 1/4 finalında "Qəbələ" ilə bu gün keçirilən ilk oyundan sonra mətbuat konfransında deyib.

O, 2:2 hesabı ilə başa çatan matçı belə şərh edib: "Meydanda oyun ritmindən uzaq olan futbolçular çox idi. Hər halda, istəkli idilər. Çox şey alınmırdı. Amma get-gedə bacardıq. Müdafiə xəttində bir az diqqətsizliyə görə bərabərlik oldu. Cavab oyunu var. O bundan da maraqlı olacaq. Əsl kubok ab-havası olacaq. Hər iki komandanın itirəcəyi bir şey yoxdur. Bəlkə də, oradakı qarşılaşma daha maraqlı olacaq. "Qəbələ"yə uğurlar arzulayıram.

Q.Qurbanov "Qəbələ" ilə ardıcıl oyunlarının olması ilə bağlı isə deyib: "Məcburuq oynamağa. Üç oyun bir komandaya qarşı oynamaq futbolçular üçün xoş deyil. Əfsuslar olsun ki, vaxtımız yoxdur. İllərlə belə hallar olub. Gərək belə matçlarda daha da peşəkar olasan. Diqqətli olmaq lazımdır. Üç oyun dalbadal oynasan da, hər matçda əvvəlkindən daha istəkli olmalısan".

Çalışdırıcı matça gəlməyən “İmarət” fan-klubunun yoxluğunu hiss etdiklərin bildirib: "Olmayanda həmişə hiss edilir. Sanki stadion boş idi. Azarkeşsiz futbol, futbola bənzəmir. İlk dəqiqələrdən hiss olunurdu".

Qurbanov  "Neftçi" ilə oyunda azarkeşlərlə bağlı olayda AFFA, PFL və "Qarabağ"dan bəyanat gəlməməsinə münasibət bildirib, O, "Sizə elə gəlmir ki, PFL piarı düzgün qurmur və azarkeşləri stadiona cəlb edə bilmir" sualını cavablandırıb:

"Neftçi" ilə oyunda belə hallar ilk dəfə deyil. Dəfələrlə görmüşük. Avropa futbolunda da var. Belə etirazlar, qarşıdurmalar daim olub. Polislə azarkeşlər arasında belə hallar olur. Yazılı olmasa da, şifahi olaraq azarkeşlərimizlə maraqlanmışıq. Bəlkə, bizdən asılı olmayan hallar var. Təbii ki, hər bir halda azarkeşləri küsdürmək olmaz. Onlarsız futbol maraqlı olmur. Azarkeşlərlə münasibətimiz həmişə yaxşı olub. Mənə aid olmayan hissədir. Həmişə klub olaraq onların yanındayıq. Problem olubsa, çatışmazlıq olubsa, aradan qaldırırlar. Azarkeşə futbolu sevdirmək lazımdır. Nəticələr və futbolumuzla. Bəzən də, rəhbərlik hansısa addım atmalıdır. Azarkeşlər burada olmasa da, yanımızda hiss edirdik. Tez bir zamanda aradan qaldırılası məsələdir. Yaxın vaxtlarda stadionda olarlar".

Baş məşqçi "Qarabağ"ın futbolçusu Kadi Borgesin Polşa millisində oynamaq ehtimalı haqda deyib: "Çünki kluba heç bir rəsmi məlumat verilməyib, təklif olunmayıb. Sadəcə buna adi söz kimi baxıram. Rəsmi təklif gələndən sonra bu barədə ətraflı danışarıq. Qərar vermək lazım olsa, bunu edərik".

Q.Qurbanov zədəsini sağaldan Abbas Hüseynovun hazırlıq durumunun yaxşı olduğunu bildirib: "Sabahdan komanda ilə tam məşqlərə başlayacaq. Qarşıdakı oyunlarda sağlam olması gözlənilir".