Ayxan Abbasov: “Kiməsə sübut üçün işləmirik”

"Sumqayıt"ın baş məşqçisi Ayxan Abbasovun müsahibəsi

- Azərbaycan kubokunun "Qarabağ"la cavab görüşündə futbolçular 120 dəqiqə meydanda oldu. Hazırda komandada fiziki cəhətdən durum necədir?

- Onsuz da sıx qrafiklə oynayırıq, çempionatın oyunları tez-tez keçirilir. Əlavə vaxt da oyanmaq bizim üçün daha da ağır oldu. Amma çalışırıq ki, onu bərpa edək. Futbolçular çətin olsa belə, buna dözməlidirlər.

- "Qarabağ"ı keçib finala çıxdığınıza görə komandaya mükafat verildi?

- Xeyr, hələ verilməyib. Ümid edirəm ki, rəhbərlik öhdəsinə düşəni edəcək. Futbolçular həqiqətən zəhmət çəkiblər. Bu gün kənardan asan görünə bilər, lakin "Qarabağ"ı yarımfinalda keçməyimiz böyük uğurdur. Son illər "Sumqayıt" "Qarabağ" və "Neftçi" kimi güclü klublarla yaxşı mübarizə aparır. Məncə, rəhbərlik bunu fikirləşib dəyərləndirəcək.

- Premyer Liqada növbəti oyununuz "Sabah"ladır. Hazırlıq necə gedir?

- Biz kubokun yarımfinal oyununu unudub, dərhal fikrimizi çempionata yönəltmişik. Bilirsiniz ki, bizim qarşıda 4 ağır oyunumuz var. Əgər yaxşı nəticə istəyiriksə, bu oyunlarda qələbə qazanmalıyıq. Əli Qurbani zədəlidir, Tellur Mütəllimov isə cəzalı durumda olduğuna görə oyunu buraxacaq. Ümumiyyətlə, komandada ab-hava yaxşıdır.

- Əli Qurbaninin durumu nə yerdədir?

- Bu gün onu müayinədən keçirəcəyik. Günün ikinci yarısından sonra daha dəqiq bilinəcək. Topu qəbul edərkən zədələnmişdi. Ümid edirik ki, bərpası çox çəkməz. Onun yoxluğu bizim üçün böyük itki olar. İnşallah, final oyununa qədər yaşıl meydanlara dönər.

- Sabah qapıda "Qarabağ"la oyunda inamlı çıxış edən Aydın Bayramov olacaq, yoxsa Mehdi Cənnətov?

- Biz onu belə təyin etmirik. Hər iki qapıçıya güvənirik. Sabah da seçim edəcəyik.

- Mayın sonlarında Azərbaycan milli komandasının toplanışı olacaq. Sizcə, Aydın Bayramov orada yerini haqq edirmi?

- Buna qərar verən milli komandanın məşqçiləridir. Mən həmişə deyirəm ki, hər iki qapıçıda böyük potensial var. Hər ikisi dəvət olunarsa, daha çox sevinərik. Çünki ikisi də əsas qapıçımızdır.

- “Sumqayıt”da maliyyə durumu nə yerdədir?

- Rəhbərlik öhdəsinə düşəni edir. Kimlərlə müqavilə bağlanıbsa, onların maaş və bonusları verilir. Bizim klubda elə bir problem olmayıb. Təbii ki, digər komandalarla müqayisə etsək, onlar qədər büdcəmiz yoxdur. Amma rəhbərlik öhdəsinə düşəni edir.

- Məhdud büdcə ilə bu cür komanda yaratmağı necə bacarmısınız?

- İlk növbədə rəhbərliklə qarşımıza qoyulan məqsəd üçün mövqelərə yaxşı oyunçular tapmışıq. Bu önəmlidir. İkincisi, burada kollektiv ruhu var, komanda ruhu var. Futbolçular, işçilər və bütün komanda üzvləri əl-ələ verib inamla addımlayır. Bundan başqa neçənci mövsümdür buradayam, çalışıb döyüşkən komanda yaratmışıq.

- Finalda "Keşlə" ilə qarşılaşacaqsınız. Sənan Qurbanovla ardıcıl ikinci il dueliniz olacaq. Revanş imkanınız var...

- Məşqçilər arasında revanş mənə qəribə gəlir. Çünki biz tez-tez qarşılaşırıq. Əlbəttə, final oyunudur, 1 oyundan ibarətdir. Hər ikimiz qalib gələ bilərik. "Keşlə" həqiqətən yaxşı klubdur, yaxşı oyunçuları var. Nəticəni hər an dəyişə biləcək futbolçulara sahibdir. Bunu yarımfinal oyununda göstərdilər. Bizim əsas məqsədimiz kuboku almaqdır. Futbolçularıma demişəm ki, biz buna layiqik.

- Avrokuboklara getmək şansınız çoxdur. Ötən mövsüm Premyer Liqa yarımçıq qaldı və sizin Avroliqaya təsadüfi getdiyinizi deyənlər oldu. İndi sübut etmək istəyirsiniz ki, bu, təsadüf deyil?

- Açığı, bizim bu məsələdə sübut etmək kimi fikrimiz yox idi. Biz öz işimizi görürük. Çünki ötən mövsüm çempionat pandemiyaya görə vaxtından əvvəl dayandı. Bəzi klubların etirazı oldu, bu da normal idi. Onların da iddiası var idi ki, avrokuboklara vəsiqə qazanarlar. Amma biz ötən il Avropa Liqasına təsadüf nəticəsində getmədik. 1 gün və ya 1 ay turnir cədvəlində uğurlu mövqedə olmadıq. Mövsümün əvvəlindən mübarizə aparırdıq. Bu ili də götürsək, mövsümün əvvəlindən həm biz, "Zirə"  və digər klublar 3-4-cü yerlər uğrunda mübarizə aparır. Biz də birinci yerdə olmuşuq, "Zirə" də birinci yerdə olub, "Neftçi", "Qarabağ" da. Davamiyyət belə gedib. "Keşlə" finala çıxandan sonra hansına komanda kənarda qala bilər. Biz də ola bilərik, başqa komandalar da. Mövsümün əvvəlindən deyirəm ki, istəyirik avrokuboklara gedək, amma bu alınmasa, bizim üçün faciə olmayacaq. Bizim gördüyümüz iş göz önündədir. Kiməsə sübut üçün işləmirik. Sabitliyi qoruyuruq.

- "Sumqayıt" Avropada oynamağa hazırdır?

- Mənim ən böyük istəyim odur ki, hazırkı heyəti qoruya bilək. Bu, vacibdir. Keçən il heyəti 8 aparıcı futbolçu tərk etdi. Belə olanda biz məşqçilər çox çətinlik çəkirik. Deyirlər ki, gedib başqa futbolçu transfer ediləcək. Xeyr, belə asan deyil. Gələn futbolçunun uyğunlaşma prosesi var. Bu, vaxt aparan amildir. Ötən mövsüm Avroliqada rəqibimiz olan "Şkendiya" güclü idi. Daha sonra Makedoniya çempionu oldular. 1 oyundan ibarət olsa da, yaxşı mübarizə apardıq. Bu mövsüm də istədiyimiz mövqelərə transferlər etsək, düşünürəm ki, uğurlu olar.

- Yeni transferlər olacaq?

- Bu il hamının müqaviləsi bitir. O cümlədən mənim də. Klub rəhbərliyi ilə belə məsələ ilə bağlı hələ görüşlər olmayıb. Çünki buna özüm ehtiyac görmədim. Bu qədər oyunların içərisində hansına məsələ haqqında görüşməyə ehtiyac yoxdur. Təbii ki, çempionat bitəndən sonra görüş olacaq, təkliflər dinləniləcək. Gələn ilin maliyyə məsələləri, qarşıya qoyulan məqsədləri görəndən sonra qərar veriləcək. Bizim də planımız var, məqsədimiz var. Bunu zamanında müzakirə edəcəyik (qol.az).