Qurban Qurbanov: “Bu o demək deyil ki, "Neftçi" zəifləyib, ya da biz güclənmişik”

“Qarabağ”ın baş məşqçisi Qurban Qurbanov Azərbaycan kubokunun 1/4 final mərhələsi çərçivəsində “Keşlə” ilə cavab oyunundan (3:1, ilk oyun 1:0) sonra mətbuat konfransı keçirib.

- Ağır oyun oldu, futbolçularıma təşəkkür etdim. Hər birimiz ağır dövr keçirdik. İstirahət dövrümüz az olacaq.

- Yarımfinal mərhələsindəki rəqib "Sumqayıt"dır. Çempionatdakı məğlubiyyətin qisasını almaq haqqında düşünürsünüz?

- Bu barədə düşünmək üçün tezdir. Kubok fərqli bir turnirdir. Bu oyunlara hazırlaşmaq üçün vaxtımız olacaq. Hər iki komandada dəyişiklik ola bilər. Oyuna yaxın daha ətraflı cavab verə bilərik.

- Ötən mövsüm qış fasiləsinə 2-ci pillədə yollanmışdınız, bu dəfə isə ilk pillədə. Sizcə, "Neftçi" zəifləyib, ya "Qarabağ" güclənib?

- Hər bir komanda mübarizə aparır. Bu dəfə xal fərqi başqa oldu, amma bu o demək deyil ki, "Neftçi" zəifləyib, ya da biz güclənmişik. Əminəm ki, hər iki komanda qış fasiləsindən sonra daha ciddi hazırlaşacaq.

- Musa Qurbanlının oyunu necə təsir bağışladı?

- Hələ debüt oyunu idi. Formalaşması üçün vaxt lazımdır. Fikir bildirmək tezdir. Öz üzərlərində çox çalışmalıdırlar.

- Göndəriləcək futbolçular müəyyənləşib?

- Bu gün Simeon Slavçevlə yollar ayrıldı. Hələ ki, heç bir fikir deyə bilmərəm. Gətirmək istədiyim futbolçular var. Hər dəfə deyirəm, amma heç bir dəyişiklik yoxdur.

- Pedro Enrikenin komandaya qaytarılacağı ilə bağlı xəbərlər yayılıb.

- Danışıqlar olub, amma bu transfer alınmadı.

- Asmir Beqoviçin gedişindən sonra yeni qapıçı transferi olacaq?

- Bir neçə variant var, danışıqlar gedir. Hələ "Bornmut" rəhbərliyi ilə danışıqlar olacaq. Amma görünən odur ki, asan həll olunacaq transferə bənzəmir.

- Vaqner da Silva 4 aydır oynamır. Oyun formasını bərpa etmək çətin olmayacaq?

- Düşünmürəm, çünki qapıçılar ən az oyun keçirən futbolçularımızdır. Şahruddin də 3 ay idi ki, oynamırdı. Belə problemin olacağını düşünmürəm.

- "Keşlə" üzərində qələbəyə çox sevindiniz, yoxsa gənc futbolçulara görə?

- Bu barədə düşünməmişdim, amma indi düşündüm. Qələbəyə sevinirik, amma 3-cü qolda gənclər daha çox sevindi.

- Riçard Almeydanın müqaviləsinin müddəti bitdi. Yeni qərar necə olacaq?

- Bitdi, amma hələ razılıq olmayıb. Danışıqlara başlamışıq, amma hələ razılaşmamışıq.