“Kəpəz”in rəqibi uduzdu

Avroliqanın I təsnifat mərhələsində “Kəpəz”in rəqibi olan “Daçiya” bu gün yoxlama oyunu keçirib. Futbolxeber.az saytının məlumatına görə, “Daçiya” Moldovanı Avroliqada təmsil edəcək digər komanda “Zarya” ilə qarşılaşıb. Matç Gəncə klubunun rəqibinin 1:2 hesablı yenilgisi ilə başa çatıb. “Daçiya”nın yeganə qolunu ikinci hissədə komandanın debüttantı Denis Kojanov vurub.

Bakıya gəlməmişdən öncə “Daçiya” daha bir yoldaşlıq görüşü keçirəcək. Moldova çempionatının gümüş medalçısı iyunun 23-də Rusiyanın “Kuban” klubu ilə üz-üzə gələcək.

Xatırladaq ki, “Kəpəz” və “Daçiya” arasında ilk oyun iyunun 28-də “Dalğa Arena”da baş tutacaq.