Əmrah Çəlikəl: “Düdelanj” asan keçiləsi rəqib deyil”

“Düdelanj” asan keçiləsi rəqib deyil. Bununla öz motivasiyamızı aşağı salmış olarıq”. Futbolxeber.az saytının məlumatına görə, bu sözləri apasport.az-a açıqlamasında “Qarabağ” klubunun icraçı direktoru Əmrah Çəlikəl deyib.

Ölkəmizi Çempionlar Liqasında təmsil edəcək Ağdam klubu ikinci təsnifat mərhələsində Lüksemburq çempionu “Düdelanj”la üz-üzə gələcək.

Hazırda İsveçrədə olan Çəlikəl bildirib ki, “Qarabağ”ın rəqibə yuxarıdan aşağı baxmağa ixtiyarı yoxdu: “Əgər “Düdelanj” öz ölkəsində çempion olubsa, deməli, bu komandaya hörmət etmək lazımdı. Heç bir komanda öz ölkəsində asanlıqla çempion olmur. Odu ki, indidən özümüzü növbəti mərhələdə saya bilmərik, buna ehtiyac yoxdu. Əslində, püşkün nəticəsini müzakirə etməli deyilik. Əsas bizim məqsədimizdi ki, o da hər kəsə bəllidi. “Qarabağ”ın hədəfi Çempionlar Liqasının qrup mərhələsində oynamaqdı. Biz bu mərhələni keçmək istəyirik. Təkcə “Düdelanj” səddini yox, növbəti rəqibimizi də mübarizədən kənarlaşdırmaq niyyətindəyik. Odu ki, rəqibi zəif və ya güclü saymaq olmaz. Bu cür yanaşmaq bizə problem yaradar. Elə o səbəbdən də buna imkan verməməliyik. Təkcə futbolçularımız yox, azarkeşlərimiz də arxayın olmamalıdılar. Onda həyəcanı azaltmış olarıq”.