"Çempionlar Liqasında rəqibin kimliyindən asılı olmayaraq, oyunlara məsuliyyətlə yanaşırıq"

"Araz-Naxçıvan" klubunun futzalçıları UEFA Çempionlar Liqasında rəqibin kimliyindən asılı olamayaraq, oyunlara məsuliyyətlə yanaşırlar.

Futbolxeber.az saytının məlumatına görə, bunu Azərbaycan Futzal Federasiyasının mətbuat xidmətinə açıqlamasında komandanın heyətində ilk dəfə bu nüfuzlu turnirdə çıxış edən Ədalət Ələkbərov deyib.

O, ardıcıl iki qələbə qazandıqları üçün məmnunluğunu fadə edib:

"Rəqibin kimliyindən asılı olmayaraq oyunlara ciddi hazırlaşır, məsuliyyətlə yanaşırıq. Çünki  bura gələndə qarşımıza konkret tapşırıq qoyulub - "Araz-Naxçıvan" növbəti mərhələyə yüksəlməlidir. Bunun üçün də yaxşı hazırlıq keçmişik. Artıq iki oyunda maksimum xal toplamışıq. Hər iki görüş məhsuldar olub. Hazırda turnir cədvəlində liderik. Sabahkı oyundakı rəqibimiz də bizimlə eyni sayda xal toplayıb. Düzdür, bizi heç-heçə də qane edəcək. Ancaq qələbə qazanıb, qarşıya qoyulan məqsədə çatmaq üçün əlimizdən gələni edəcəyik".

Gənc futzalçı debüt etdiyi Çempionlar Liqasının ab-havasından danışıb: "Komandanın ən gənc üzvlərindən biriyəm. Baş məşqçimiz daim nəzarətdə saxlayır. Hər iki oyunda şans verib. Bu cür yarışlarda qazanılan təcrübə əvəzsizdir. Çalışıram bu şansdan həm komandamın xeyrinə, həm də öz inkişafım üçün istifadə edim. Komandanın dəstəyini hiss edirəm, bu da gənc futzalçı üçün əvəzolunmaz stimuldur".

Qeyd edək ki, "Araz-Naxçıvan" UEFA Çempionlar Liqasının Avstriyada təşkil olunan ilkin mərhələsində Şimali İrlandiyanın "Sparta Belfast" klubunu 9:1, Şotlandiya təmsilçisi "PYF Saltires"i isə 7:2 hesabı ilə məğlub edib. Sabah rəqib Avstriya çempionu "Ljuti Krajişniçi" olacaq.