Millimizin futzalçısı: “Xorvatiyaya uğurlu nəticə qazanmaq üçün gəlmişik”

“Rəqiblərə hörmət edirik, ancaq biz də bura uğurlu nəticə qazanmaq üçün gəlmişik”.

Futbolxeber.az saytının məlumatına görə, bunu Azərbaycanın 19 yaşadək futzalçılardan ibarət yığmasının üzvü Pünhan Qasımzadə Avropa çempionatının əsas mərhələsində Bosniya və Herseqovinaya qarşı keçirəcəkləri matçdan öncə Futzal Federasiyasının mətbuat xidmətinə açıqlamasında deyib.

O, şansları belə dəyərləndirib: “İlk rəqibimiz Bosniya və Herseqovinadan olan həmyaşıdlarımızdır. Bilirik ki, bizi gərgin qarşılaşma gözləyir. İlkin mərhələdəki rəqiblərimizlə bu komandaları müqayisə etmək olmaz. Ona görə daha məsuliyyətli və ciddi olmalı, mümkün qədər az səhv etməliyik. Təbii ki, rəqiblərə hörmət edirik, ancaq biz də bura uğurlu nəticə qazanmaq üçün gəlmişik”.

Millimizin üzvü komandanın hazırlığı barədə də danışıb: “Bu turnirin hazırlığına martın 16-dan başlamışıq. Bakıda 8 günlük təlim-məşq toplanışı keçirdik. Baş məşqçimiz bu müddətdə əsasən fiziki məşqlər və taktiki çalışmalar üzərində işləməyi tapşırdı. Faydalı bir hazırlıq prosesi oldu. Ən əsası, zədələnən olmadı. Hazırlıq zamanı 2 oyun keçirdik. Onlardan biri yoxlama, digəri Yüksək Liqanın qarşılaşması idi. Xüsusilə də lider “Baku Fire” ilə görüşümüz daha maraqlı keçdi. Ardıcıl 2 oyun keçirməyimizdə məqsəd bu turnirdəki sıx oyun qrafikinə uyğunlaşmaq və güclü rəqiblərə qarşı hazır olmaq idi. Yanvarda Avropa çempionatının ilkin mərhələsində iştirak edən heyətlə müqayisədə 2 dəyişiklik var".

Qasımzadə yorğunluğa baxmayaraq, yaxşı əhval-ruhiyyədə olduqlarını bildirib: "Bu gün uzun yol yorğunluğuna baxmayaraq, oyunöncəsi son məqşimizə çıxdıq. Bu dəfə sırf taktiki gedişlər və standart vəziyyətlərin icrası üzərində işlədik. Yorğun olsaq da, əhval-ruhiyyəmiz yaxşıdır".

Qeyd edək ki, bu gün Xorvatiyanın Omiş şəhərindəki Ribnyak İdman Arenasında baş tutacaq Bosniya və Herseqovina - Azərbaycan matçının start fiti saat 19:00-da səsləndiriləcək.