Minifutbolu futzala dəyişən Avropa çempionumuz: “Milli həmişə ürəyimdədir”

2022-ci ildə minifutbol millimiz Avropa çempionu oldu. Finalda Seymur Məmmədovun vurduğu həlledici qol Azərbaycan yığmasına tarixində ilk dəfə qitə çempionluğu qazandırdı. Daha sonra millimiz dünya çempionatında dördüncü olanda da, “Zirə” Çempionlar Liqasında üçüncü yeri tutanda da o, komandanın aparıcı üzvü idi. Kapitan bu yay Bosniya və Herseqovinanın paytaxtı Sarayevoda keçirilən Avropa çempionatının da iştirakçısı oldu. Millimiz qitə birinciliyinin 1/4 finalında Qazaxıstana penaltilər seriyasında uduzaraq (6:7) mübarizəni dayandırdı.

Bütün bunları xatırlamağımız səbəbsiz deyil. Çünki həmin yarışdan sonra Seymur Məmmədov gözlənilmədən minifutboldan uzaqlaşdı. Yeni mövsümdən “Zirə”nin heyətində görünməyən təcrübəli futbolçu daha yığmanın da formasını geyməyəcək. Çünki Məmmədov artıq minifutbolu futzala dəyişib. “Neftçi” İK-nin formasını geyən Seymur Azərbaycan yığmasına da dəvət alır. Dekabrın 17-də, AVRO-2026-nın əsas mərhələsi çərçivəsində milli komandamızın İsveçlə qarşılaşmasında Seymur da meydanda idi.

Maraqlıdır, birdən birə nə baş verdi ki, Avropa çempionu, millinin kapitanı minifutboldan uzaqlaşdı?

“Heç nə baş vermədi. Sadəcə futzal oynamaq istədim. Buna görə də qayıtdım futzala. Başqa heç nə. Minifutbol millisi hər zaman ürəyimdədir. Hər zaman da onlarlayam”.