“Milli təkcə təəccübləndirmədi, həm də ümid verdi”

“Fikrimcə, İsveçlə oyunda 2 xal itirmədik, 1 xal qazandıq. Özünüz də gördünüz ki, çətin oyun oldu”.

Futbolxeber.az saytına müsahibəsində bu sözləri futzal millimizin üzvü Seymur Məmmədov AVRO-2026-nın əsas mərhələsi çərçivəsində İsveçə qarşı keçirilən oyun (3:3) barədə danışarkən deyib.

O, skandinaviyalılarla matçda millimizin bəxtsizliklə üzləşdiyini bildirib: “Heyətdə yer alanların əksəri cavan uşaqlardır. Buna baxmayaraq, komanda şəklində əlimizdən gələni etdik. Bir qədər bəxt rəqibin tərəfində oldu. Biz şanslarımızı qaçırdıq, rəqib isə yaxaladığı epizodları qola çevirdi”.

S.Məmmədov bildirib ki, millimizin məqsədi qrupdan çıxmaqdır: “Yaxşı nəticəyə ümid edirik. Heyətimiz cavanlardan ibarətdir. Buna baxmayaraq, məqsədimiz qrupdan çıxmaqdır. Hamı vuruşur, döyüşür. İnanıram ki, uşaqlar artıracaqlar. Səhvlərimizin üzərində işləyəcəyik. Növbəti oyuna daha yaxşı vəziyyətdə çıxacağıq”.

Millimizin üzvü özlərinə inanmalı olduqlarını vurğulayıb: “Yığma İsveçlə oyunda tək təəccübləndirmədi, həm də ümid verdi. Növbəti oyunlarda çox şey edə bilərik. Sadəcə özümüzə inanmaq lazımdır”.

İbrahim Cəfərov