Vitali Borisov: “Bu gün qələbəyə layiq idik”

“Oyuna yaxşı başladıq, qol da vurduq. Sadəcə, birinci hissədə çox cərimə qazandıq və 5 foul limitini erkən doldurduq. Bundan sonra öz oyunumuzu oynaya bilmədik, ehtiyatlı olmağa çalışdıq. Çünki 12 dəqiqə ərzində əlavə cəriməyə görə 10 metrlik təyin olunacaqdı”.

Futbolxeber.az saytının məlumatına görə, bu sözləri futzal millimizin baş məşqçisi Vitali Borisov bu gün AVRO-2026-nın əsas mərhələsi çərçivəsində İsveçə qarşı keçirilən oyundan (3:3) sonra deyib.

O, millimizin ikinci hissədə daha yaxşı oynadığını qeyd edib: “Uşaqların oyununu bəyəndim. Epizodlarımızdan istifadə edə bilmədik. Rəqib isə 5-ci oyunçu ilə oynadı və 2 qol vurdu. Bunun üzərində çox işləmək lazımdır. Təəssüf ki, millinin toplanışında buna çox vaxt ayırmaq olmur. Matçın başa çatmasına 2 saniyə qalmış hesabı bərabərləşdirsək də, uşaqlar yaxşı mübarizə apardılar, sona qədər “vuruşdular”. Rəqibin fərqləndiyi ikinci qolda hakim səhv qərar qəbul etdi. Top rəqibdən çıxsa da, autdan topu onlar oyuna daxil etdilər və qol vurdular. Bu oyunda qələbəyə layiq idik”.

Mütəxəssis yeni komanda qurduqlarını vurğulayıb: “Yerli futzalçılarla işləməkdən həzz alıram, amma çatışmayan cəhətlərimiz də kifayət qədərdir. Bu gün heyətimizdə yaşlı futzalçılar var. Onlar da bir neçə ildən sonra karyerasını başa vuracaq. Ona görə gəncləri tapmalı, onları öyrətməliyik”.