Vitali Borisov: “Şanslar 50-nin 50-yədir”

DÇ-2024-ün elit-raund mərhələsində sentyabrın 15-də səfərdə Rumıniya ilə qarşılaşacaq Azərbaycan millisinin bu gün KİV üçün açıq məşqçi və baş məşqçi Vitali Borisovun iştirakı ilə brifinq keçirilib.

Futbolxeber.az saytının məlumatına görə, jurnalistlərin suallarını cavablandıran V.Borisov deyib:

“Ölkə xaricində çıxış edən futzalçılarımız da dünəndən komandaya qoşulub. 1-2 nəfərdə yüngül problem var. Gecə komanda səfərə çıxır. Rumıniya yığmasının Mərakeşlə 2 yoldaşlıq, Danimarka və Finlandiya ilə seçmə mərhələ görüşünü izləmişik. Taktiki baxımdan necə oynadıqlarını, müdafiədə necə hərəkət, nə zaman pressinq etdiklərini bilirik. Artıq oyunçulara da müəyyən fikirlərimizi çatdırmışıq. Son 2 məşqimizi Rumıniyada reallaşdıracağıq və son tapşırıqları da orada verəcəyik. Komanda ilə birgə oyun epizodlarına baxış olacaq. Şanslar 50-nin 50-yədir”.

O, sentyabrın 20-da Bakıda Niderlanda qarşı keçirəcəkləri matçdan da söz açıb: “Niderland millisini hələ analiz etməmişik. Ancaq müəyyən informasiyamız var. Onların hazırkı baş məşqçisini yaxşı tanıyırıq. Vaxtilə bir yerdə işləmişik, Rusiyada oynayanda məşqçim olub”.

Borisov millinin baş məşqçisi kimi debütunda uğur qazanmaq istədiyini söyləyib: “Milli komandanın baş məşqçisi kimi debüt oyunum olacaq. Hər kəs uğurlu nəticə qazanmaq istəyir. İnşallah biz də bunun öhdəsindən gələrik. Komandada əhval-ruhiyyə yaxşıdır”.