Tahir Gözel: “Bu, Qurban hocanın da arzusu idi, amma alınmırdı...”

"Qarabağ"ın prezidenti Tahir Gözel UEFA Avropa Liqasının birinci təsnifat mərhələsinin ilk oyununda İslandiyanın “Vestri” klubunu 3:0 hesabı ilə məğlub etdikləri görüşdən sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- Start möhtəşəm alındı.

- Ölkə futbolu adına möhtəşəm start verdik. “Sabah” ilk müjdəni verdi. 2:0 hesablı qələbə ilə. “Zirə”, maşallah, 3:0-lıq qalibiyyət əldə etdi. Ardınca da “Qarabağ” ölkəmizə zəfər gətirdi. Çox razıyam. Çox gözəl bir oyun oldu. Üç qoldan ikisini yeni transferlər vurdu. Bu, məni çox sevindirir.

- Yenilənmiş “Qarabağ”a necə təəssürat yaratdı?

- Bu, ilk oyun idi. İnşallah, komanda çox güclənəcək. Müdafiəmiz də, hücumumuz da yaxşı təsir bağışladı. Zubir əla qol vurdu. Əslində biz uzun müddət idi danışırdıq ki, nəyisə təzələmək lazımdır. Bu, Qurban hocanın da arzusu idi. Amma alınmırdı. Bu dəfə hamımız başa düşdük ki, hər şey dəyişməlidir. 8 oyunçu transfer etmişik. Qurban hoca “Vestri” ilə oyunda onların demək olar hamısına şans verdi.

- Yenə tranfer olacaq?

- İnşallah, olacaq. “Qarabağ”a tarixindəki ən böyük büdcəni vermişik. Mən bunu keçən il də demişdim. Bu, həqiqətən də belədir. Bu il “Qarabağ” tarixinin ən güclüsüdür. Daha bir neçə transfer gözləyirik. Qurban hoca istəsə, biz də onu dəstəkləyəcəyik.

- Demək olar ki, köklü dəyişikliyə səbəb çempionluğun əldən getməsi oldu?

- Bəzən həyat insanı etməli olduğu hərəkətə vadar edir. Bizə bəlkə də bu lazım idi ki, özümüzə gələk və radikal addımlar ataq. Düz deyirsiniz, bəlkə də çempion olsaydıq, bizdə bu qədər yenilənməyə cəsarət olmayacaqdı. Mən hesab edirəm ki, həyatda uğurlar qədər insanın düşdüyü çətinliklər də ona kömək edir. “Qarabağ” bu vəziyyətdən düzgün istifadə etdi. Doğru yoldayıq, mən bunu bilirəm.

- Kamilo Duranın gedişi “Qarabağ” tarixində ən bahalı satış olacaq. Bunu gözləyirdiniz?

- Bizim Duranı buraxmaq fikrimiz yox idi. Hətta o qiymətə də. “Qarabağ”ın bu gün şükür ki, o pula ehtiyacı yoxdur. Biz futbolçu alanda onu asanlıqla buraxmırıq, satmırıq. İstəyirik ki, bizə gələnlər də ambisiyaları böyük futbolçular olsun. Ümidləri olmalıdır ki, “Qarabağ”dan daha böyük yerlərə gedəcəyik. Düşündük ki, satsaq, bu, gələcək futbolçular üçün stimul olar. Özünə düzgün qiymət verən futbolçunu buraxırıq. Ağır qərar idi. Saxladıqca qiyməti artır. Amma bu, gələcək üçün lazım idi.

- 1 il qabaq ölkə çempionatında legioner limitinin əleyhinə olduğunuzu demişdiniz. İndi hansı fikirdəsiniz?

- Həmin fikirdəyəm. Legioner limitinin ləğvi qısa müddətdə klublara kömək edir. Amma ölkə futboluna xeyrini görmürəm. Hesab edirəm ki, bu, zərərdir. Amma oyunun qaydası necədirsə, biz də ona uyğun oynayırıq.

- “Qarabağ”ın baza tikmək üçün ərazi aldığı deyilir. Bu, doğru xəbərdir?

- Bu haqda danışmaq hələ tezdir, alınsa, həyatımın ən xoşbəxt günündə hamınızı dəvət edəcəm. Amma hələ bir xəbər yoxdur. Biz də maraqla gözləyirik. Hər insan istəyir ki, öz izini buraxsın. Bu baş versə, mənim Azərbaycan futboluna töhfəm olacaq.

- Rəqibin gücünü nəzərə alsaq, “Vestri” ilə matçda bu qədər azarkeş olacağını gözləyirdiniz?

- Bəli, digər klublarla müqayisədə azarkeş sayı 5 qat oldu. Bu, “Qarabağ”a olan sevgidir. Mən bunu görürəm, daha da ruhlanıram. Böyük dəstək idi. “Qarabağ”ın ölkəmizin ürəyində başqa yeri var. Adımızla, tariximizlə başqa yer tutmuşuq.

- Elvin Cəfərquliyevin klubdakı gələcəyini necə görürsünüz?

- Mən onun getməsinin tərəfdarı deyiləm. Amma bu, klub prezidenti kimi fikdimdir. Qərar verən Qurban hocadır. O necə desə, elə də olacaq.