“Turan Tovuz"un təklifini qəbul etməməyimdə Ayxan Abbasovla dostluğumuz başlıca roy oynamadı”

“Boş olan vakansiyaya hamı kimi mənim də adım namizədlər arasında idi. Təklif də o periodda oldu”.

Futbolxeber.az saytına müsahibəsində bu sözləri “Qarabağ” Futbol Akademiyasının koordinatoru Aftandil Hacıyev “Turan Tovuz”un baş məşqçi vəzifəsinə namizəd olması haqda danışarkən deyib.

Mütəxəssis qeyd edib ki, Tovuz klubunun rəhbərliyi ilə görüşüb: “Qısa görüşməmiz oldu. Düşünmürəm ki, “Turan Tovuz” rəhbərliyi məndən incik olar. Təklifi qəbul etmək üçün doğru zaman olmadığını düşünürəm. Bəzi nüanslar var ki, onlar barədə danışmağın mənası yoxdur. Gələcəkdə əməkdaşlıq barədə yenidən müzakirə aparmaq olar”.

“Bilirik ki, “Turan Tovuz”un sabiq baş məşqçisi Ayxan Abbasovla yaxın dostsunuz. Təklifi qəbul etməməyinizdə bu amil nə dərəcədə rol oynadı?” sualını A.Hacıyev belə cavablandırıb: “Bu amil başlıca rol oynamadı. Mənim üçün önəmli olan peşəkar yanaşmadır. “Turan Tovuz” rəhbərliyi ilə aramızda olan söhbətləri təfərrütları ilə açıqlamaq istəmirəm. Tovuz klubuna uğurlar arzulayıram. “Turan Tovuz” vaxtı ilə oynadığım, bəyəndiyim klublardandır. Əla azarkeşləri var. Düşünürəm ki, daha yaxşısına layiqdirlər”.

Fərəc ASLANOV